केही दिनदेखिको अत्यधिक गर्मीले बाँकेको कृषि क्षेत्रमा असर पारेको छ । गर्मीले सबैभन्दा असर तरकारी खेतीमा पारेको जानकी गाउँपालिका– ३ का लालजी घरुकले बताए । उनले अकासे पानी नपर्दा फल्न लागेको तरकारी सुक्न थालेको जानकारी दिए । ‘फल लागेको तरकारी सुक्न थालेको छ । चर्को गर्मीले रोगसमेत लागेको छ,’ उनले भने ।
घरुकले अकासे पानी नपर्दा तरकारीमा फूल सुकेर झर्ने समस्या देखापरेको बताए । बोरिङबाट पानी सिँचाइ गरे पनि बढ्न नसकेको उनको भनाइ छ । ‘फल लाग्छ, तर सुकेर झर्छ । बोट पनि मर्न लागेको छ,’ उनले भने । गर्मीले ड्रागन खेतीमा पनि असर परेको छ । पानी नपरेका कारण ड्रागनको बोटसमेत सुक्न थालेको जानकी गाउँपालिका– ३ का कमल रानाले बताए । उनले पहिलो चरणको फल लिन नपाएको बताए । ‘यो दोस्रो लट हो । पहिलो लटको पनि फल लिन पाएनौँ । दोस्रो लटको फूल पनि सुकेर फल लाग्न पाएको छैन,’ उनले भने । फूल लागे पनि फल नलाग्ने र सानो फल्ने समस्या देखिएको उनले बताए । ‘यसपालि राम्रो आम्दानी लिने वेला थियो । पानी नपरेर फल लाग्न पाएको छैन,’ उनले भने, ‘पानी नपाएर बोट सुक्न थालेको छ ।’
गर्मीले धानको ब्याड राखेको खेतमा धाँजा फाटेको छ । समयमा पानी नपर्दा ब्याड राखेको खेतमा धाँजा फाटेको नरैनापुर गाउँपालिका– ५, मटेहियाका रामसोहन यादवले बताए । उनले बोरिङको पानीले धान्न नसकेको बताए । ‘लामो खडेरीले बोरिङबाट पानी आउन छाडिसक्यो । सिँचाइ गर्न नपाउँदा ब्याड राखेको खेतमा धाँजा फाटेको छ,’ उनले भने ।
नेपालगन्जमा फेरि गर्मी बिदा
अत्यधिक गर्मी बढेपछि नेपालगन्ज उपमहानगरले फेरि तीन दिन गर्मी बिदा दिएको छ । यसअघि एक हप्ता गर्मी बिदा दिएको उपमहानगरले १०–१२ असारसम्म गर्मी बिदा दिएको हो । गर्मीले बालबालिकालाई विद्यालय आउजाउ गर्न र पठनपाठनमा समस्या भएकाले उपमहानगरभित्रका सम्पूर्ण विद्यालयमा तीन दिन बिदा दिने निर्णय भएको शिक्षा महाशाखा प्रमुख गोर्खबहादुर थापाले जानकारी दिए । ‘अत्यधिक गर्मीले साना बालबालिकालाई विद्यालय जान र आउन तथा अध्ययन–अध्यापनमा समस्या देखिएको छ,’ उनले भने ।
