उपत्यकामा यसपटक सम्बन्धित क्षेत्रमै मतगणना हुने भएको छ। यसअघि काठमाडाैंका १० सै क्षेत्रको राष्ट्रिय सभागृहमा गणना हुने भएको थियो।
यसपटक सम्बन्धित क्षेत्रमै मतगणना निर्णय मुख्य निर्वाचन अधिकृतको कार्यालयले गरेको छ ।
जसअनुसार काठमाडौं १ को मुख्य निर्वाचन अधिकृतको कार्यालय रहेको सहकारी प्रशिक्षण केन्द्र, नयाँ बानेश्वर, काठमाडौं २ को मुख्य निर्वाचन अधिकृतको कार्यालय कागेश्वरी मनोहरा नगरपालिका थली, काठमाडौं ३ को गोकर्णेश्वर नगरपालिका ४ चामुण्डा स्कुलमा मतगणना हुने भएको छ।
काठमाडौं ४ को निर्वाचन अधिकृतको कार्यालय रहेको बुढानीलकण्ठ २ स्थित जेष्ठ नागरिक समाज भवन चपली, काठमाडौं ५ को टोखा नगरपालिका ६ स्थित सामुदायिक भवनमा मतगणना हुनेछ।
त्यस्तै, काठमाडौं ६ को तारकेश्वर नगरपालिका कार्यालय धर्मस्थली, काठमाडौं ७ को बहुउद्देश्यीय मार्सल आर्टस् केन्द्र खुसिबु, काठमाडौं ८ को नागार्जुन नगरपालिका भवनसँगैको जनउद्धार माध्यमिक विद्यालय, काठमाडौं ९ को चन्द्रागिरि नगरपालिकाको कार्यालय, बलम्बु र काठमाडौं १० को कीर्तिपुर २ स्थित सामुदायिक भवनमा मतगणना हुने भएको छ।
त्यस्तै, ललितपुर १ को गोदावरी नगरपालिका कार्यालय बज्रबाराही, ललितपुर २ को खुमलटारस्थित कृषिको कार्यालय र ललितपुर ३ को जावलाखेलमा मतगणनास्थल तोकिएको छ।
त्यस्तै, भक्तपुर १ मा जिल्ला अदालत भक्तपुर र भक्तपुर २ मा बोडेस्थित तालिम केन्द्रमा मतगणना हुने भएको छ।
सर्वपक्षीय सहमति भएमा बिहीबार बेलुकादेखि नै मतगणनाको तयारी भइरहेको छ।
मतगणनास्थलमा सिसिक्यामेरा र तारजालीको समेत व्यवस्था भइसकेको निर्वाचन आयोगले जनाएको छ।
