नेपाली फुटबल टिमकी सावित्रा भण्डारी ‘साम्बा’लाई इन्टरनेट सेवाप्रदायक कम्पनी भायानेट कम्युनिकेसनले पाँच लाख रुपैयाँ आर्थिक सहयोग गर्ने घोषणा गरेको छ । साम्बा यतिवेला घुँडाको गम्भीर चोटका कारण मैदानबाहिर छिन् । यस चुनौतीपूर्ण समयमा भायानेटले आफ्नो ब्रान्ड एम्बेसडरको उपचार र पुनरागमनका लागि पाँच लाख सहयोग गर्ने प्रतिबद्धता जनाएको छ ।
‘साम्बाको शल्यक्रिया र त्यसपछिको करिब आठ महिना लामो रिह्याब प्रक्रियाका लागि ठुलो स्रोतको आवश्यकता छ । उनको अदम्य आँटलाई सम्मान गर्दै भायानेटले उनलाई पुनः खेल जीवनमा फर्काउन यो सानो प्रयत्न गरेको हो,’ कम्पनीले भनेको छ ।
भायानेटले आफ्नो ब्रान्ड एम्बेसडरप्रति देखाएको यो तत्परताले जस्तोसुकै कठिन परिस्थितिमा पनि प्रयोगकर्ता र सरोकारवालासँग अटुट सम्बन्ध र भरपर्दो कनेक्सन कायम राख्ने कम्पनीको मूल मन्त्रलाई थप चरितार्थ गरेको जनाएको छ । साम्बाको स्वास्थ्य लाभको कामना गर्दै भायानेटले भनेको छ, ‘देशको गहना साम्बाको रिकभरीको हरेक पाइलामा हामी साथै रहनेछौँ । उहाँ चाँडै निको भएर मैदान फर्कने र देशलाई पुनः गौरवान्वित बनाउने कुरामा हामी विश्वस्त छौँ ।’
