सीमापार विद्युत् प्रसारण आपूर्ति गर्न लिट्मस इन्डस्ट्रिजलाई भारतको स्वीकृति

नेपालको तार, केबल तथा कन्डक्टर उत्पादक लिट्मस इन्डस्ट्रिज लिमिटेडले भारतको पावर ग्रिड कर्पोरेसन अफ इन्डिया (पिजिसिआइएल)बाट उच्च क्षमताको विद्युत् प्रसारणलाइन आपूर्ति गर्न अनुमति प्राप्त गरेको छ । पिजिसिआइएल भारतको केन्द्रीय विद्युत् प्रसारण निकाय हो, जसले देशको अन्तरराज्य तथा सीमापार विद्युत् प्रसारण सञ्जाल सञ्चालन गर्छ । यस स्वीकृतिसँगै लिट्मस इन्डस्ट्रिज सीमापार विद्युत् प्रसारण परियोजनाका लागि चयन हुने एक मात्र नेपाली उत्पादक बनेको छ ।

सम्झौताअनुसार कम्पनीले चार सय केभी एसिएसआर मुस कन्डक्टर दुई हजार सात सय ९९ किलोमिटर उत्पादन तथा आपूर्ति गर्नेछ । यी कन्डक्टर नेपालको डिडिङ–ढल्केबर र भारतको बथनाहा सीमापार प्रसारणलाइन परियोजनामा प्रयोग गरिनेछ । उक्त प्रसारणलाइन नौ सय मेगावाट क्षमताको अरुण–३ जलविद्युत् आयोजनासँग सम्बन्धित छ । नेपालमै पहिलोपटक चार सय केभी एसिएसआर मुस कन्डक्टर उत्पादन हुन लागेको हो । यसले देशको प्रविधिक तथा औद्योगिक क्षमतामा महत्वपूर्ण उपलब्धि हासिल गर्ने कम्पनीको भनाइ छ । पिजिसिआइएलले लिट्मस इन्डस्ट्रिजको कारखाना मूल्यांकन गरेको थियो । मूल्यांकनपछि कम्पनीलाई परियोजनाका लागि कन्डक्टर आपूर्ति गर्न योग्य एक मात्र नेपाली उत्पादकका रूपमा स्वीकृति प्रदान गरिएको हो । अन्तर्राष्ट्रिय प्रतिस्पर्धामा सामेल भएर छनोट हुनु नेपालका लागि गौरवको विषय भएको कम्पनीले जनाएको छ । 

यो स्वीकृतिले कम्पनीलाई विश्वसनीय अन्तर्राष्ट्रिय आपूर्तिकर्ताका रूपमा स्थापित गरेको लिट्मसले जनाएको छ । यसले नेपाली उद्योगको विस्तारका साथै सीमापार ऊर्जा पूर्वाधार विकासमा नेपालको सहभागिता सशक्त बन्दै गएको संकेत दिनेछ । लिट्मस इन्डस्ट्रिज रमेश कर्प समूहअन्तर्गतको उद्योग हो । यसले नेपालमा तार, केबल तथा कन्डक्टर उत्पादन गर्दै आएको छ ।