मन्दिरदेखि पश्चिमतर्फका १० घर दलित बस्तीसँगै जोडिएको पूर्वपट्टिको बाटोमा ऐलानी भनेर बलजफ्ती पर्खाल उठाइयो
सिराहाको विष्णुपुर गाउँपालिका– ४ थलहा कटाहामा दलित परिवारले प्रयोग गरिरहेको बाटो नै छेकेर दुर्गा मन्दिरका लागि पर्खाल निर्माण गरिएकोे छ । आधा दर्जनभन्दा बढी (चमार) दलित परिवारको घरसम्म आउन मन्दिर क्षेत्रको जग्गा हुँदै बाटो रहेकोमा मन्दिरमा पर्खाल उठाएर छेक्न लागिएको हो ।
स्थानीय रामएकबाल महरा भन्छन्–
मन्दिरपछाडि रहेको मेरो घरसम्म पुग्ने बाटो नम्बरी जग्गामा छ । मन्दिरलाई घेरेर पर्खाल लगाएपछि मसहित दक्षिणपट्टिका ६ घर छिमेकीलाई पनि समस्या भएको छ । उत्तरतर्फका चार घरलाई पनि उही समस्या परेको छ । पर्खाल नहुँदासम्म मन्दिरको चौर हुँदै सिधै मूल सडकसम्म निस्किन सकिन्थ्यो । अहिले बन्द भएको छ ।
स्थानीय रामएकबाल महराले मन्दिरबाट आफूहरूको घरसम्म आउने सडक नम्बरी जग्गा रहे पनि पर्खाल उठाउँदा बाटो बन्द भएको गुनासो गरे । ‘मन्दिरपछाडि रहेको मेरो घरसम्म पुग्ने बाटो नम्बरी जग्गामा छ । मन्दिरलाई घेरेर पर्खाल लगाएपछि मसहित दक्षिणपट्टिका ६ घर छिमेकीलाई पनि समस्या भएको छ । पर्खाल नहुँदासम्म मन्दिरको चौर हुँदै सिधै मूल सडकसम्म निस्किन सकिन्थ्यो । अहिले बन्द भएको छ,’ उनले भने ।
उक्त पर्खाल मधेश सरकारको पर्यटन विकास कार्यालयले ५० लाख ६० हजार लागतमा १३ जेठबाट निर्माण गरिरहेको छ । अहिलेसम्म मन्दिरको उत्तरतर्फबाट मोडिएर करिब ५० मिटर दक्षिण आएपछि घर पुग्न सकिनेमा अब अवरोध भएको स्थानीय सुनिता महराले बताइन् । ‘मन्दिरको पश्चिमपट्टि घर रहेका छिमकीले बाटो मेरो नम्बरी जग्गामा हो भनिरहेका छन्, हामीलाई घरबाट मूल सडकसम्म निस्किन पनि गाह्रो भइरहेको छ,’ उनले भनिन् ।
अर्की पीडित सजनदेवी महराले पनि मन्दिरदेखि पश्चिमतर्फ रहेका १० घर दलित बस्तीसँगै जोडिएका पूर्वपट्टिको बाटो पनि ऐलानी भनेर बलजफ्ती पर्खाल बनाइएको बताइन् । ‘उत्तरतर्फ घर रहेका छिमेकीले मेरो नम्बरी जग्गा हो भनिरहेका छन्, उनले त्यो जग्गा छेके भने हाम्रो आवतजावत नै बन्द हुन्छ,’ उनले भनिन् ।
मन्दिरको दक्षिण–पश्चिम कुनामा रहेका चैता महरा, रामशंकर महरा, जैनन महरा, शिबु महरा, शिवशंकर महरा, सञ्जय महरा र रामखेलावन महराको घरअगाडिसम्म सार्वजनिक जग्गा बाटोका रूपमा उपयोग भइरहेको थियो । कम्पाउन्ड वाल र गेट निर्माणका लागि वीरेन्द्रकुमार यादवको अध्यक्षतामा उपभोक्ता समिति गठन गरिएको छ । तर, निर्माणको काम भने ठेकेदारमार्फत भइरहेको स्थानीयले बताए ।
मर्का परेको भए पुनर्विचार हुन्छ : वडाध्यक्ष
विष्णुपुर गाउँपालिका– ४ थलहा कटहाका वडाध्यक्ष रामबाबु यादवले बाटो कायम राखेरै पर्खाल निर्माण भइरहेको, तर चित्त नबुझेको भए पुनर्विचार गर्न सकिने बताए । ‘मन्दिरको पर्खाल निर्माण गर्नुअघि मन्दिरसँगै उहाँहरूको सहमति लिइएको हो,’ उनले दाबी गरे, ‘तर, मन्दिरको भोगचलनमा रहेको बाटोको जग्गाधनी दर्ता प्रमाण पुर्जा छ भने अहिले पनि मन्दिरको पर्खाल पूर्वतिर सार्न सक्छौँ । हिँड्ने बाटो अवरोध गरिएको हो भने सच्याउँछौँ ।’ मन्दिरको निर्माणाधीन पर्खालभन्दा ६ फिट पश्चिमपट्टि बाटोको केन्द्र मानेर सिमेन्टको किल्ला ठोकिएको र सिमेन्टको किल्लाभन्दा पश्चिमतर्फ ६ फिट जोडेर १२ फिटको बाटो छाडिएको उनले दाबी गरे ।
