भारत–पाकिस्तान तनावका कारण रोकिएको इन्डियन प्रिमियर लिग (आइपिएल) शनिबारदेखि पुनः सुरु हुँदै छ। लिग चरणका खेल अन्तिम चरणमा पुगेकाले आइपिएलका बाँकी खेल थप रोमाञ्चक हुने आकलन गरिएको छ।
शनिबार बेंग्लोर र कोलकाताबिच प्रतिस्पर्धा हुँदै छ । बेंग्लोरमा हुने यो खेल जित्नैपर्ने दबाब कोलकातामाथि छ । ११ खेल खेलिसकेको कोलकाताले पाँचवटा मात्र खेल जितेको छ। ११ अंकसहित ऊ अंकतालिकाको छैटौँ स्थानमा छ।
बेग्लोर भने ठुलो दबाबमा छैन । ११ खेलमा आठ जित निकालेको बेंग्लोर १६ अकंसहित दोस्रो स्थानमा छ । प्लेअफमा पुग्न उसलाई अब एक जित पर्याप्त छ । लिग चरणमा उसका तीन खेल बाँकी छन्।
अंक–तालिकाको पहिलो स्थानमा गुजरात टाइटन्स् छ । ११ खेलमा गुजरातले आठ जित निकालेको छ । प्लेअफमा स्थान सुरक्षित गर्न उसलाई पनि एक जित पर्याप्त छ ।
अंक–तालिकाको तेस्रो स्थानमा पन्जाब, चौथाेमा मुम्बई, पाँचौँमा दिल्ली छन् । त्यस्तै, सातौँ स्थानमा रहेको लखनउको पनि सम्भावना कायमै छ । चेन्नई, राजस्थान र हैदरावाद भने प्लेअफको प्रतिस्पर्धाबाट बाहिरिसकेका छन् ।
