पाँचजना परिवार बस्ने घर असोज दोस्रो साता आएको बाढीले बगाएपछि रोशी गाउँपालिका–२ नारायणटारका उमेश श्रेष्ठ बिचल्लीमा परेका थिए । बस्दै आएको घर बगाएपछि उमेशका परिवार छिमेकीको शरणमा थिए । आफ्नै घरमा बस्ने कहिले हो ठेगान थिएन । घर कहिले बनाउने र कसरी बनाउने भन्ने चिन्ताले चार महिनायता राम्रोसँग निदाउन नसकेको श्रेष्ठको भनाइ छ । केही दिनयता भने उमेशको अनुहारमा हल्का खुसी छाएको छ । उनको अनुहारमा खुसी ल्याउने कारण बनेको छ, अस्थायी घर ।
उनले भने, ‘वृद्ध बुबा र सानी छोरीको चिन्ताले राति निद्रा नै लाग्दैनथ्यो । बाढीले घर बगाएपछि सानी छोरी र वृद्ध बुबासहित पाँचजनाको परिवार बिचल्लीमा थियौँ । रातभर निद्रै लाग्दैनथ्यो । अब भने धेरै राहत महसुस गरेको छु । आफ्नै घरमा बस्न पाएको छु ।’
सोही स्थानकी लक्ष्मी सेन्चुरीलाई पनि अब बाँच्ने आशा पलाएको छ । उनको पनि लगाएको कपडाबाहेक घर बाढीले बगाएको थियो । सर्वस्व बगाएपछि उनी कसरी बाँच्ने र परिवारलाई कसरी बचाउने बन्ने चिन्तामा थिइन् । ‘लगाएको एकसरो कपडाबाहेक सबै बगाएपछि धेरै मन रोएको थियो । बाँच्ने मनसमेत मरेको थियो । अब कोही छैन, केही गरी घर बनाउन सकिँदैन भन्ने पिरले सताएको थियो,’ सेन्चुरीले भनिन्, ‘साँच्चै भन्नुपर्दा हामी अब मरे पनि हुने भन्ने अवस्था थियो । अर्काको घरमा कतिन्जेल बस्ने भन्ने लाग्थ्यो । तर, गाउँपालिकाको संयोजनमा सामाजिक संस्थाहरू आए र हाम्रो घर बन्यो । अब बाँच्ने आशा पलाएको छ ।’
गत १० देखि १२ असोजसम्म परेको अविरल बर्सातपछिको बाढीले रोशी गाउँपालिका– २ नारायणटार क्षतविक्षत भएको थियो । बर्खामा बग्ने खोल्सा बढेर बस्तीमा पसेको थियो । बाढीले केहीको घर बगाउने र भत्काउने गरेको थियो भने केहीको पुरेको थियो । केही घर बाढीले सोहरेर बस्नै नमिल्ने थियो । अहिले उक्त बस्तीमा रोशी गाउँपालिकाको पहलमा सेभ द चिल्ड्रेन र किडाज नेपालको सहयोगमा अस्थायी घर निर्माण भएको छ । अस्थायी आवास निर्माणका लागि पीडित प्रतिपरिवारले ५० हजार पाउने प्राकृतिक प्रकोप व्यवस्थापन प्राधिकरणको मापदण्डअनुसार सोही मूल्यबराबरका अस्थायी आवास निर्माण सामग्री प्रदान गरिएको छ । अस्थायी आवास निर्माणका लागि बाँस, सिमेन्ट, जस्तापाता, किलाकाँटालगायतको सामग्री प्रदान गरिएको हो ।
तीनकोठे घर बनाउनका लागि पुग्ने सामग्री प्राप्त भएको बाढीपीडित सविन सेन्चुरीले बताए । थोरै सामग्री थप गरेर बनाएको उनको भनाइ छ । स्थायी घर बनाउँदासम्म मजाले बस्न मिल्ने उनले बताए ।
बाढीपहिरोले रोशी गाउँपालिका– २ मा ६९ घर पूर्ण क्षति र ३४८ घरधुरीमा आंशिक क्षति भएको थियो । यसमध्ये नारायणटारका ३७ घरपरिवारले अस्थायी आवास पाएको वडाध्यक्ष हस्तमान लामाले बताए । अन्य पीडित परिवारको आवास निर्माण पनि गाउँपालिकाको सहयोगमा भइरहेको वडाध्यक्ष लामाले बताए ।
बाढीपहिरोले रोशीमा ५५० घर पूर्ण क्षति र एक हजार दुई सयभन्दा बढी घर आंशिक क्षति भएको रोशी गाउँपालिकाका अध्यक्ष दिनेश लामाले जानकारी दिए । पीडितलाई राहत र आहतपछि अहिले अस्थायी आवास निर्माणमा लागिपरेको उनको भनाइ छ । गाउँपालिकाको स्रोत प्रशस्त नभएकाले अस्थायी आवास निर्माणका लागि संघसंस्थामा पहल गरिरहेको लामाले बताए । सोही क्रममा नारायणटारमा ३७ परिवारलाई र वडा नं. ९ नार्केमा १५ परिवारका लागि अस्थायी आवास निर्माण गरिरहेको उनले बताए ।
