नीरज तामाङले कोर्स रेकर्ड बराबरी गर्दै समग्रमा आठ अन्डर दुई सय ६४ को स्कोर गरी करिअरकै पहिलो उपाधिका रूपमा सूर्य नेपाल काठमाडौं ओपन जितेका छन् । प्रतियोगिताको अघिल्लो दिन ६ स्ट्रोकको दरिलो अग्रता लिएका भुवन नगरकोटीलाई नीरजले एक स्ट्रोकले हराउँदै उपाधि जितेका हुन् । उनले एक लाख २० हजार रुपैयाँ पाएका छन् ।
सूर्य नेपाल गल्फ टुर २०२३–२४ अन्तर्गतको सातौँ प्रतियोगिताको अन्तिम दिन धरानका प्रोफेसनल नीरजले आठ अन्डर ६० स्कोरको सानदार नतिजामा शिवराम श्रेष्ठको कोर्स रेकर्ड बराबरी गरेका हुन् । शिवरामले सन् २०१५ मा एनपिजिए प्रेसिडेन्ट्स कपमा आठ अन्डर गरेका थिए । लगातार तीन दिन शीर्ष स्थानमा रहेका भुवनभन्दा नीरज सात स्ट्रोकले पछि थिए । अन्तिम १८ होलको सुरुवातमा भुवनसँग दिनेश प्रजापतिविरुद्ध ६ स्ट्रोकको फराकिलो अग्रता थियो ।
तर, भुवनले इभन पार ६८ स्कोर गर्दै समग्रमा सात अन्डर दुई सय ६५ स्कोरसहित दोस्रो स्थानमा चित्त बुझाए । उनले ८२ हजार रुपैयाँ प्राप्त गरे । चार अन्डर ६४ स्कोरका साथ तेस्रो स्थानमा रहेका जयराम श्रेष्ठले ६६ हजार रुपैयाँ पाए । समग्रमा इभन पार दुई सय ७२ स्कोर गरेका तोरणविक्रम शाही चौथो भए । समग्रमा दुई ओभर दुई सय ७४ स्कोरसहित पाँचौँ भएका धनबहादुर थापाले ४५ हजार रुपैयाँ पाएका छन् ।
