एकीकृत समाजवादीले सरकारमा सहभागिताका लागि प्रधानमन्त्रीसमक्ष चारबुँदे माग अघि सारेको छ ।
आज बसेको केन्द्रीय सचिवालयको पाँच घण्टा लामो बैठकले आफूहरूले अघि सारेका चारबुँदे मागको उचित सम्बोधन भए मात्र सरकारमा जाने निर्णय लिएको छ ।
एकीकृत समाजवादीले देशको आर्थिक संकटको समाधान गर्दै उत्पादन वृद्धि र रोजगारी सिर्जना गर्ने, राष्ट्रहितको रक्षा र संवर्द्धन गर्ने, भ्रष्टाचारको अन्त्य र सुशासन कायम गराउने, महँगी नियन्त्रणलगायत जनताका समस्याहरूको समाधान गर्ने र सन्तुलित परराष्ट्र नीति कायम गर्ने विषयमा प्रधानमन्त्रीको स्पष्ट धारणा माग गर्न लागेको हो ।
प्रधानमन्त्री पुष्पकमल दाहाल प्रचण्डसँग छलफलका लागि बैठकले अध्यक्ष माधवकुमार नेपाल, उपाध्यक्ष प्रमेश हमाल र महासचिव घनश्याम भुसाललाई जिम्मेवारी दिएको छ । तीन नेताहरू प्रधानमन्त्री प्रचण्डसँग छलफलका लागि बालुवाटारतर्फ लागिसकेका छन् ।
