सर्वाेच्च अदालतका न्यायाधीश नहकुल सुवेदीको सुरक्षामा खटिएका नेपाल प्रहरीका नायब निरीक्षक (सइ) प्रभाकर खड्काको पेस्तोल चोरी गर्ने दुईजना पक्राउ परेका छन् । सिन्धुलीका मेघबहादुर तामाङ र सिन्धुपाल्चोकका वासुदेव थामीलाई जिल्ला प्रहरी परिसर काठमाडौंले पक्राउ गरेको हो ।
कागेश्वरी मनोहरा नगरपालिका– १ स्थित सइ खड्काको घरबाट गत ३१ असारमा पेस्तोल चोरी भएको थियो । सो पेस्तोल नारायणटार बस्ने तामाङको कोठाबाट बरामद भएको जिल्ला परिसरका प्रवक्ता एसपी कुमोध ढुंगेलले जानकारी दिए । दुवैजना मोबाइल चोरीमा संलग्न व्यक्ति हुन् ।
सइ खड्काको घरको पहिलो तलाबाट थामीले अंकुशे लगाई झोला चोरी गरेका थिए । सोही झोलामा पेस्तोल पनि थियो ।थामीले अन्य स्थानीयको पनि मोबाइल चोरी गरेकाले त्यसउपर उजुरी परेको थियो । मोबाइल चोरीको अनुसन्धान गर्ने क्रममा उनीहरू पक्राउ परेको र पेस्तोल पनि बरामद भएको हो ।
पक्राउ परेकाबाट पाँचवटा मोबाइल पनि बरामद भएको र ती मोबाइल चोरीको हुन सक्ने जिल्ला प्रहरी परिसर काठमाडौंका प्रवक्ता एसपी ढुंगेलले बताए । सो घटनामा सइ खड्कालाई प्रहरी प्रधान कार्यालयले निलम्बन गरी आन्तरिक छानबिन गरिरहेको छ ।
