खेलकुद प्रिन्ट संस्करण

युक्रेनी फुटबल खेलाडीमा उत्साह त्रासबीच घरेलु लिग पुनः सुरु

‘खार्किभ सहरलाई सम्झँदा मुटु चस्किन्छ,’ युक्रेनी फुटबल क्लब मेटालिस्ट १९२५ खार्किभका गोलकिपर डेनिज सिडोरेन्को भन्छन्, ‘मिसाइलले हाम्रो तालिम मैदानमा क्षति पुग्यो । पहिला हामी खेलेको ठाउँ अहिले बाँकी छैन ।’युद्ध सुरु हुँदा सिडोरेन्कोआबद्ध फुटबल क्लब युक्रेनी प्रिमियर लिगको विन्टर ब्रेकमा पनि प्रशिक्षणमा थियो । रसियन आक्रमणको दुई दिनपछि सबै खेल गतिविधि ठप्प भए । रुसी हमलाको ६ महिना पूरा हुँदा आक्रमणको त्रासबीच युक्रेनले घरेलु फुटबल प्रतियोगिता पुनः सुरु गरेको छ ।

राष्ट्रपति भोलोदिमिर जेलेन्स्कीको ३२ अगस्टको आदेशअनुसार युक्रेनमा प्रिमियर लिग पुनः सुरु भएको छ । लिग सुरु भएपछि खेलाडी मात्रै होइन, फुटबलप्रेमीहरू पनि उत्साहित बनेका छन् । ‘लिग पुनः सुरु हुनु देशका लागि राम्रो हो,’ युक्रेनी फुटबल महासंघका प्रमुख एन्ड्री पावेल्को भन्छन्, ‘यो कदम युक्रेनले जित्न सक्छ र जित्छ भन्ने विश्वलाई संकेत हो ।’
रुसी हमलापछि धेरै टिम अपेक्षित रूपमा सुरक्षित मानिएको पश्चिमी सहर लिभिभमा स्थानान्तरण भएका छन् । फुटबल क्लब डायनामो किभ राजधानी वा वरपरको क्षेत्रमा खेल्ने योजना बनाएको क्लबमध्ये एक हो । 

सिडोरेन्कोको समूहले स्लोभाकियाको सीमा क्षेत्र उज्होरोडमामा तालिम दिइरहेको छ, जुन खार्किभ सहरबाट १३ हजार किलोमिटर टाढा छ । खार्किभका अधिकांश भाग युद्धले 
क्षतविक्षत छन् । खेलकुदका गतिविधि सुरु भएपछि खेलाडीले एक–अर्कालाई भेट्न थालेका छन् । ‘खेलाडीको फेरि भेट भएपछि हामीले हरेक विषयका बारेमा छलफल ग¥यौँ । युद्ध सुरु हुँदा को कहाँ थियो र उनीहरूले के गरेका थिए भन्नेबारे चर्चा गर्‍यौँँ,’ फेब्रुअरीमा प्रेमिकासँगै पश्चिम युक्रेन गएका ३३ वर्षीय सिडोरेन्कोले भने, ‘अहिले कडा मिहिनेतका साथ अभ्यास गरेका छौँ । हाम्रा प्रशंसकलाई खुसी पार्न चाहन्छौँ र हरेक प्रतियोगिता जित्न चाहन्छौँ ।’ 

फुटबल गतिविधि पुनः सुरु भए पनि तत्कालका लागि दर्शकलाई मैदानमा जान रोकिएको छ । सरकारले रंगशालामा विशेष सुरक्षा व्यवस्था गरेको छ ।

लिग सुरु गर्ने विषयमा  कहिलेदेखि छलफल भयो ?
युक्रेनी फुटबल संघका अध्यक्ष पाभेल्कोले यस सिजनमा खेलहरू कसरी राख्ने भन्नेबारे रक्षा मन्त्रालयसँग छलफल गरेका थिए । फुटबल गतिविधि पुनः सुरु भए पनि तत्कालका लागि दर्शकलाई मैदानमा जान भने रोकिएको छ । सरकारले रंगशालामा विशेष सुरक्षा व्यवस्था गरेको छ । स्वीकृत रंगशाला हवाई साइरनजडित र बमबाट सुरक्षित हुनेछन् । ‘सबै लिग खेल्नु राम्रो हो । यसले हरेकको मनोबल बढाउँछ,’ उनी भन्छन् । 

डायनामो किभ क्लबको महिला टोलीबाट खेल्ने अन्ना माइरोन्चुक फुटबलको पुनरागमनको सम्भावनाबाट उत्साहित भएको बताउँछिन् । केही समय भए पनि दिमागलाई युद्धबाट टाढा लैजान सहयोग गर्ने उनको भनाइ छ । ‘मैदानमा पुनः फर्किंदा, खेल्दा, गोल हान्दा र जित्दा खेलाडीले आनन्द महसुस गर्नेछन्,’ उनले भनिन् । रुसी हमलापछि माइरोन्चुकको टिमका साथीहरू दुई सातासम्म बंकरमा बस्न बाध्य भए । ‘फुटबलमा के हुनेछ भनेर कसैलाई थाहा थिएन,’ डायनामोका महिला प्रशिक्षक भोलोदिमिर पेट्रेन्को भन्छिन्, ‘तर, हाम्रा निर्देशकले हामीलाई छाडेनन् । हामी जुममा सुन्थ्यौँ र खेलाडीहरूलाई व्यक्तिगत काम दिन्थ्यौँ ।’ 

त्यसपछिका महिनामा डायनामोको पुरुष टोली र साख्तर क्लबले ‘शान्तिका लागि विश्वव्यापी भ्रमण’मा सहायता रकम जुटाउन देशबाहिर मैत्रीपूर्ण खेल खेले । युक्रेनका लागि दुईपटक खेलिसकेका साख्तरका गोलकिपर अनातोइली टुबिन भन्छन्, ‘पहिलो खेलमा हामीमध्ये केही राष्ट्रिय गानपछि रोयौँ ।’