सुर्खेत प्रहरीले छोरीलाई बलात्कार गरेको आरोपमा एक बाबुलाई पक्राउ गरेको छ । १२ वर्षीया बालिका बलात्कार गरेको आरोपमा सुर्खेत गुर्भाकोट नगरपालिकानिवासी बालिकाका बुबालाई प्रहरीले पक्राउ गरेको हो ।
यही साउन २६ गते घटना भएको भए पनि दुई दिनपछि मात्रै घटना सार्वजनिक भएको थियो । बालिकालाई बलात्कार गरेको जानकारी आफन्तहरूले दिएपछि प्रहरी चौकी मेहलकुनाबाट गएको टोलीले पीडकलाई शनिबार नियन्त्रणमा लिएको जिल्ला प्रहरी कार्यालय सुर्खेतका प्रवक्ता एवं प्रहरी नायब उपरीक्षक सुरज कार्कीले बताए । पक्राउ पर्ने बाबुको परिचय भने खुलाइएको छैन ।
पीडित बालिकाको कर्णाली प्रदेश अस्पताल कालागाउँमा स्वास्थ्य परीक्षण गरिएको र थप अनुसन्धान भइरहेको प्रवक्ता कार्कीले बताए । ‘छोरीलाई बलात्कारको आरोपमा पक्राउ परेका उनका बुबालाई नियन्त्रणमा लिएर अनुसन्धान भइरहेको छ,’ उनले भने, ‘इलाका प्रहरी कार्यालय छिन्चुले अनुसन्धानका लागि आइतबार म्याद थप गरेको छ ।’
उनीविरुद्ध जबर्जस्ती करणी उद्योगअन्तर्गत मुद्दा अघि बढाइएको प्रहरीले जनाएको छ ।
