एमाले उपाध्यक्ष सुवास नेम्वाङले अहिलेको गठबन्धन धेरै समय रहिरहन नहुने बताएका छन् । बिहीबार बुटवलमा प्रेस चौतारी रुपन्देहीले आयोजना गरेको पत्रकार सम्मेलनमा उनले चुनावको मिति घोषणासँगै सरकार कामचलाउमा परिणत भएको बताउँदै पाँचदलीय गठबन्धन दूषित भएको उनले आरोप लगाए ।
सरकारले अब महत्वपूर्ण र मुलुकलाई दूरगामी असर पार्ने निर्णय गर्न नपाउने उनले बताए । निर्वाचनको मिति घोषणा गर्नु स्वागतयोग्य भएको बताउँदै उनले सरकारले छापामार शैलीमा चुनावको मिति घोषणा गरेको टिप्पणी गरे ।
अहिलेको गठबन्धन संसदीय मूल्य र मान्यताविपरीत भएकाले गठबन्धन भए पनि संसदीय मूल्य र मान्यतामा आधारित रहेर हुनुपर्ने उनले तर्क गरे । ‘हाम्रो संविधानले मिश्रित निर्वाचन प्रणालीको व्यवस्था गरेको छ, यो निर्वाचन प्रणालीअनुसार एउटै दलको बहुमत आउन अप्ठ्यारो छ,’ उनले भने । अहिलेको गठबन्धन संसदीय मूल्य र मान्यता रहेर नबनेको उनले आरोप लगाए ।