बाह्रखरी मिडिया प्रालिअन्तर्गतको बाह्रखरी बुक्सले चौथो डिसहोम बाह्रखरी कथालेखन प्रतियोगिताका लागि कथा आह्वान गरेको छ । प्रतियोगितामा संसारभरका नेपाली कथा लेखकले भाग लिन पाउनेछन् । नेपाली आख्यान साहित्यमा अग्रज साहित्यकारहरूको सम्मान र नवप्रतिभालाई प्रोत्सानका लागि प्रतियोगिता आयोजना गरेको आयोजकको भनाइ छ ।
प्रतियोगितामा सहभागी कथामध्येबाट बाह्रखरीको आन्तरिक निर्णायकमण्डलले ५० कथा छनोट गरी निर्णायकमण्डललाई उपलब्ध गराउनेछ । निर्णायक समूहले ‘उत्कृष्ट कथा ०७९’ पुस्तकका लागि २५ वटा छान्ने र त्यसैमध्येबाट प्रथम, द्वितीय र तृतीय कथा घोषणा हुने आयोजकको भनाइ छ।
साहित्यकार तथा समालोचक प्रा.डा. कुमारप्रसाद कोइरालाको संयोजकत्वमा साहित्यकारहरू सगुना शाह र उमा सुवेदी निर्णायक रहनेछन् ।