स्वास्थ्य वैज्ञानिकहरूको आठौँ राष्ट्रिय सम्मेलन काठमाडौंमा सुरु भएको छ । तीनदिने सम्मेलन आइतबार सुरु भएको हो । सम्मेलनमा विभिन्न विषयमा गरिएका अनुसन्धानलाई जनतामाझ लैजाने विषयमा छलफल हुने नेपाल स्वास्थ्य अनुसन्धान परिषद्का सदस्य सचिव डा. प्रदीप ज्ञवालीले बताए ।
उनले सरकारले अनुसन्धानको क्षेत्रमा लगानी बढाउँदै जानुपर्ने बताए । सदस्यसचिव ज्ञवालीले सरकारले अनुसन्धान संस्था विकास गर्ने, अनुसन्धानकर्ताहरूको वृत्तिविकास गरेर उनीहरूलाई अभ्यास गर्ने वातावरण मिलाउनुपर्नेमा जोड दिए । उनले नेपाल सरकारले तोकेको स्वास्थ्यका प्राथमिकताको क्षेत्रभित्र रहेर अनुसन्धान भयो वा भएन भन्ने विषयको जानकारी राख्नुपर्ने आवश्यकता रहेको पनि औँल्याए ।
सदस्यसचिव ज्ञवालीले अनुसन्धानकर्ताहरूले गरेको अनुसन्धान अनुसन्धानका लागि मात्रै नभई जनताको आवश्यकता परिपूर्ति गर्ने किसिमका हुनुपर्ने बताए ।
