समाचार प्रिन्ट संस्करण

कक्षा १२ को उत्तर पुस्तिका परीक्षणमा अनियमितता

परीक्षण अधिकृतको स्वीकृतिबेगर अंग्रेजी विषयको उत्तर पुस्तिका जाँच, जाँचकी शिक्षकले करिब एक सय उत्तरपुस्तिकामा ७५ देखि ९० अंकसम्म दिए

कक्षा १२ को उत्तरपुस्तिका परीक्षणमा अनियमितता भएको पाइएको छ । असोज दोस्रो साता सम्पन्न कक्षा १२ को परीक्षाको उत्तरपुस्तिका परीक्षण गर्दा भएको अनियमिततामा राष्ट्रिय परीक्षा बोर्ड विराटनगरका प्रमुख डम्बर बतासको संलग्नता देखिएको छ । उनले चलाखीपूर्वक ठूला निजी विद्यालयहरूसँग साँठगाँठ गरेको खुलेको छ ।

विराटनगरको बरगाछीस्थित गोग्राह उच्च माविमा उत्तर पुस्तिका जाँच परीक्षण केन्द्र तोकिएको थियो । १६ असोजदेखि सुरु भएको परीक्षण केन्द्रमा एउटै शिक्षकले अलग अलग विद्यालयको उत्तर पुस्तिकाको पोका सुटुक्क खोल्न लगाएर जाँच गरेको परीक्षण अधिकृत सीमा राईले भेटेपछि शिक्षकहरूसँग विवाद भएको थियो । त्यसपछि उत्तर पुस्तिका जाँच स्थगित भएको थियो । अब दसैँपछि मात्र परीक्षण सुरु हुने परीक्षा बोर्ड प्रदेश १ कार्यालयका सूचना अधिकारी दाया राईले बताए । ‘२१ असोजमा विवाद भएपछि जाँच कार्य स्थगित छ, अब बोर्डको निर्देशनअनुसार दसैँपछि जाँच सुरु हुन्छ,’ उनले भने । 

२१ असोजमा विराटनगरस्थित मेरिल्यान्ड माविका शिक्षक गणेश दहालले परीक्षण अधिकृतको स्वीकृतिबेगर धमाधम अंग्रेजी विषयको उत्तर पुस्तिका जाँच गरेका थिए । उनले जाँच गरेको करिब एक सय उत्तरपुस्तिका सबैमा ९० देखि ७५ सम्म अंक दिएका थिए । स्वीकृतिविनै उत्तरपुस्तिकाको पोका खोलेर जाँच गरेको पाइएपछि परीक्षण अधिकृत राईले शिक्षक दहाललाई सबै कापी फिर्ता गर्न चेतावनी दिएकी थिइन् । त्यसपछि उनीहरूबीच विवाद सुरु भएको थियो । त्यसपछि शिक्षक दहालले माफी माग्दै आफूलाई बोर्डका कर्मचारीले नै उत्तर पुस्तिकाको पोको खोलेर जाँच गर्न दिएको बताएका थिए । तर, उनले कुन कर्मचारीले पोको खालेर पुस्तिका दिएका हुन् भन्ने बताउन चाहेनन् । 

परीक्षण अधिकृत राईले आफ्नो अनुपस्थितिमा अलग्गै पोका खोलेर कपी जाँच गरेको पाइएपछि माथिल्लो तहमा जानकारी गराएर जाँच गरेका सबै उत्तरपुस्तिका नियन्त्रणमा लिएको र जाँच गर्न लागेको उत्तरपुस्तिका फिर्ता लिएको बताइन् । ‘मैले सबै कुरा बोर्ड प्रमुख र सदस्य सचिव दुर्ग अर्याललाई जानकारी गराइसकेको छु र जिल्ला प्रशासनलाई जानकारी गराएर सबै उत्तर पुस्तिका दराजमा राखेर तालाचाबी म आफैँले राखेकी छु, गलत को हो अनुसन्धानले प्रस्ट बनाउला,’ उनले भनिन् ।

हालसम्म परीक्षा बोर्ड कार्यालय विराटनगरले केही विद्यालयको अंग्रेजी र अर्थशास्त्रको केही उत्तरपुस्तिका मात्र जाँच गरेको छ । बाँकी उत्तरपुस्तिका जाँच गर्न बाँकी छ । उत्तरपुस्तिका जाँच गर्दा परीक्षा बोर्डले जाँचकी शिक्षकहरूलाई कोड नम्बर दिएर जाँच गराउने गर्दछ । सँगसँगै पालना गर्नुपर्ने निर्देशन टाँस गरेर, अनुशिक्षण गराएर, केन्द्रमा जानकारी गराउने गर्दछ । नियमअनुसार आफैँले पढाएको विद्यालयका विद्यार्थीको उत्तर पुस्तिका शिक्षकले जाँच गर्न पाउँदैनन् । 

कक्षा १२ को उत्तरपुस्तिका यो वर्ष परीक्षा बोर्ड आफैँले परीक्षण गर्ने योजनाअनुसार विराटनगरमा परीक्षण केन्द्र तोकेर १६ असोजदेखि उत्तर पुस्तिका परीक्षण गराउन थालेको थियो । तर, कार्यालय प्रमुख डम्बर बतासेले पूर्वतयारी नहुँदै परीक्षण अधिकृतसमेतको अनुपस्थितिमा उत्तरपुस्तिका परीक्षण सुरु गरेका थिए । उनले एकजना करारका कार्यालय सहयोगीलाई बिहान ५ बजे नै कार्यालयमा बोलाएर उत्तर पुस्तिका आफूलाई दिन निर्देशन दिएका थिए । उत्तरपुस्तिका परीक्षण विवादमा परेपछि कार्यालय प्रमुख बतासेले सबै जिम्मा परीक्षण अधिकृतले नै लिनुपर्ने बताउँदै आएका छन् ।