- वि.सं २o८१ बैशाख २२ शनिबार
रसुवाको स्याफ्रुबेँसीमा रहेको ‘लाङटाङ खोला जलविद्युत् आयोजना’को फाइनान्सियल क्लोजर सम्पन्न भएको छ । आयोजनामा सनराइज बैंकको अगुवाइमा सिद्धार्थ बैंक तथा एनसिसी बैंकले तीन अर्ब रुपैयाँ लगानी गर्ने भएका हुन् ।
लगानीसम्बन्धी सम्झौतामा प्रवर्द्धक कम्पनी मल्टी इनर्जी डेभलपमेन्ट प्रालि र बैंकबीच वित्तीय व्यवस्थापनका लागि हस्ताक्षर भएको जनाइएको छ । २० मेगावाट क्षमताको आयोजनको लागत अनुमानित तीन अर्ब ६४ करोड रुपैयाँ रहने जनाइएको छ ।
कम्पनीले आयोजनाको निर्माण कार्य ठेकेदार परिचालन भएको ३० महिनाभित्र सम्पन्न गरी विद्युत् उत्पादन सुरु गर्ने लक्ष्य लिएको कम्पनीले जनाएको छ । आयोजनाको निमार्ण पूरा भई उत्पादन लाङटाङ राष्ट्रिय निकुञ्जभित्र रहेको चिलिमे हब सबस्टेसनमा लगेर जोडिने जनाइएको छ ।
कम्पनीका अनुसार आयोजनाबाट वार्षिक १३३.३० गिगावाट घन्टा विद्युत् उत्पादन हुनेछ । जसमा सुक्खायामको उत्पादन ३४.७ गिगावाट घन्टा र वर्षायामको उत्पादन ९८.६ गिगावाट घन्टा हुने उल्लेख छ ।
