- वि.सं २०७८ कार्तिक १ सोमबार
जनता समाजवादी पार्टी (जसपा)को आधिकारिकता नपाएको महन्थ ठाकुर पक्ष अध्यादेशबारेको सूचना राजपत्रमा प्रकाशित भएपछि मात्रै पार्टी दर्ताका लागि निर्वाचन आयोग जाने भएको छ। नेता लक्ष्मणलाल कर्णका अनुसार पार्टी दर्ताको तयारी पूरा भएको छ। नयाँ पार्टीको नाम जसपा नेपाल लोकतान्त्रिक र चुनाव चिह्न साइकल राख्ने तय भएको छ। नेता कर्णले सूचना राजपत्रमा आएपछि मात्रै आयोग जाने जानकारी दिए।
‘नाम जसपा नेपाल लोकतान्त्रिक र चुनाव चिह्न साइकल राख्ने गरी तय भइसकेको छ,’ उनले नयाँ पत्रिकासँग भने, ‘राजपत्रमा सूचना प्रकाशित हुनेबित्तिकै जान्छौँ। मिल्यो भने आजै दर्ताका लागि जान्छौँ।’ राष्ट्रपति विद्यादेवी भण्डारीले बुधबार ‘राजनीतिक दलसम्बन्धी (दोस्रो संशोधन) अध्यादेश, २०७८’ जारी गरेकी थिइन्। अध्यादेश जारी भएको सूचना राजपत्रमा प्रकाशित भएपछि मात्रै आधिकारिक मान्ने गरिन्छ।
