नेपाल कम्युनिस्ट पार्टी (नेकपा) प्रचण्ड–माधव समूहका अध्यक्ष पुष्पकमल दाहाल प्रचण्डले प्रधानमन्त्री केपी ओलीले सार्वभौमिकतामाथि हमला गरेको बताएका छन् । आफूनिकट पत्रकारहरूको संगठन प्रेस संगठन नेपालको दोस्रो राष्ट्रिय भेलालाई मंगलबार सम्बोधन गर्दै प्रचण्डले ओलीले प्रतिनिधिसभा विघटन गरी राजतन्त्रलाई पुनर्स्थापित गर्ने तथा देशलाई निरंकुशता र अराजकताको भुमरीमा लैजाने प्रक्रियाको सुरुवात गरेको दाबी गरे । ओलीको यस कदमलाई हरमूल्यमा रोक्ने उनले बताए ।
प्रचण्डले ओलीले विदेशी शक्तिको विरोध गरेर राष्ट्रवादको नारा लगाए पनि तिनै विदेशीसँग लम्पसार परेर पार्टी फुटाउने दुस्साहस गरेको बताए । ओलीको राष्ट्रवाद खोक्रो तथा सामन्ती राष्ट्रवाद रहेको प्रचण्डको टिप्पणी छ ।