पालिका अपडेट

कोरोनाको नयाँ संस्करणबाट संकटमा बेलायत, एकै दिन ५७ हजार सात सय संक्रमित थपिए

कोरोना भाइरस (कोभिड– १९) को नयाँ संस्करणको प्रकोपबाट संकटग्रस्त बनिरहेको बेलायतमा शनिबार एकै दिन ५७ हजार सात सय २५ जना संक्रमित थपिएका छन् । संक्रमितको संख्या निरन्तर बढिरहेकाले बेलायत सरकारले भोलि सोमबारदेखि सुरु हुन लागेको प्राथमिक स्कुलको नयाँ शैक्षिक सत्र सुरु नगर्न निर्देशन दिएको छ । 

सरकारको यो निर्णयसँगै केही विद्यालय र शिक्षकसँग सम्बन्धित संघसंस्थाले केही क्षेत्रमा कोरोना भाइरस फैलँदैमा देशैभरका विद्यालय बन्द गर्नु नहुने तर्क गरेका छन् । जसका कारण राष्ट्रिय स्वास्थ्य सेवा (एनएचएस)प्रति दबाब बढिरहेको जनाइएको छ । बेलायतका शिक्षासचिव विलियम्सनका अनुसार संक्रमण देशैभर बढिरहेको छ । त्यसमा पनि लन्डनमा संक्रमण दर निकै छ । यसकारण देश र आमनागरिकको स्वास्थ्यप्रति ध्यान दिँदै यो कदम चालिएको उनको भनाइ छ ।   

नयाँ संस्करणको कोरोना भाइरसबाट विशेष गरी लन्डन, दक्षिण पूर्व इंग्ल्यान्ड बढी प्रभावित भएका छन् । यी क्षेत्रमा पूर्व अनुमान गरिएभन्दा पनि बढी संक्रमित फेला पर्न थालेका छन् । भाइरस नियन्त्रण गर्नका लागि कडा खालका नियम अपनाउनुपर्ने अवस्था छ । स्वास्थ्यसचिव म्याट ह्यानककका अनुसार पछिल्लो एक सातामा लन्डनमा संक्रमितको संख्या निरन्तर बढेको मात्रै छैन अस्पतालमा उपचार गर्न जानेको संख्या पनि बढिरहेको छ ।  जसका कारण अस्पतालमा भिडभाड हुन थालेको छ । 

बेलायतमा शुक्रबार ५३ हजार दुई सय ८५ जनामा कोभिड– १९ संक्रमण फेला परेको थियो । यसमध्ये ६ सय १३ जनाको मृत्यु भएको थियो । योसहित बेलायतमा हालसम्म ७४ हजार जनाले कोरोना संक्रमणका कारण ज्यान गुमाइसकेका छन् । राष्ट्रिय स्वास्थ्य सेवा (एनएचएस) का अनुसार आगामी साता बेलायतको अवस्था अझै खराब हुन सक्ने चेतावनी दिएका छन् ।