बराह क्षेत्रमा आयुर्वेदिक पद्धतिबाट संक्रमितको उपचार गर्ने तयारी
सुनसरीको बराह क्षेत्रको चतराधाममा रहेको रामानन्द सेवा पीठ आश्रममा स्थापना हुने एक सय ५० बेडको आइसोलेसन उपचार केन्द्रमा आयुर्वेदिक पद्धतिबाट संक्रमितको उपचार गर्ने प्रदेश सरकारको तयारी छ ।
सामाजिक विकासमन्त्री जीवन घिमिरेले शनिबार चतरा पुगेर सुनसरीका प्रमुख जिल्ला अधिकारी राजेश पौडेल, बराह क्षेत्र नगरपालिकाका प्रमुख निलम खनाल, तीनवटै सुरक्षा निकायका प्रमुख र रामानन्द सेवा पीठ व्यवस्थापन समितिका पदाधिकारीलगायतसँग छलफल गरेका छन् ।
स्वकीय सचिव तिलक बस्नेतका अनुसार मन्त्री घिमिरेले बराह क्षेत्रमा आयुर्वेदिक पद्धतिबाट उपचार गरिने निष्कर्ष तयारी सुनाएका छन् । उनले आश्रमको आइसोलेसनमा मन्त्रालयबाट विज्ञसहितको आयुर्वेदको टिम खटाउने जानकारी दिएका छन् । उनका अनुसार बराह क्षेत्रमा आइतबारदेखि आइसोलेसन उपचार केन्द्र निर्माणको काम सुरु हुनेछ ।
प्रदेश सरकारले मोरङको सुन्दर हरैँचाको गोठगाउँस्थित पूर्वाञ्चल विश्वविद्यालय, झापाको दमक, सुनसरीको बराह क्षेत्र र नेपाली सेनाको पूर्वी पृतना इटहरीमा गरी चार सय ५० बेडको आइसोलेसन उपचार केन्द्र निर्माणको घोषणा गरेको छ । कोरोनाको लक्षण देखिएकालाई कोभिड अस्पताल र कोरोना रिपोर्ट पोजेटिभ आएका, तर सामान्य प्रकृतिकालाई आइसोलेसन केन्द्रमा राखेर उपचार गर्ने प्रदेश सरकारको तयारी छ ।