विश्व डिजिटल संस्करण

उत्तर कोरियाली नेता किमद्वारा मल्टिपल रकेट लन्चरको परीक्षण निरीक्षण

उत्तर कोरियाका नेता किम जोङ उनले मल्टिपल रकेट लन्चर परीक्षणको निरीक्षण गरेका सरकारी सञ्चारमाध्यमले बताएका छन्। प्योङयाङले रुसलाई हतियार आपूर्ति गरेको आरोप लगाइएपछि यो पछिल्लो हतियार परीक्षण हो।

धेरै हदसम्म एक्लो परेको उत्तर कोरियाले हालै मस्कोसँगको सैन्य सम्बन्धलाई बलियो बनाएको छ। साथै उसले यसै महिना आफूविरुद्धको अन्तर्राष्ट्रिय प्रतिबन्धको अनुगमन गर्ने संयुक्त राष्ट्र विशेषज्ञहरूको एउटा प्यानलको नवीकरणलाई रोक्नका लागि भिटो प्रयोग गरेकामा रुसलाई धन्यवाद दिएको छ।

दक्षिण कोरिया र संयुक्त राज्य अमेरिकाले उत्तर कोरियामाथि रुसलाई हतियार आपूर्ति गरेको आरोप लगाउँदै आएका छन्। संयुक्त राष्ट्रसंघले त्यस्तो कुनै पनि कदमलाई प्रतिबन्ध लगाएको छ। आणविक हतियारसम्पन्न उत्तर कोरियाले युक्रेनमा प्रयोग गर्नका लागि रुसमा पठाउनुअघि क्रुज मिसाइलहरूको परीक्षण र उत्पादन बढाउन सक्ने विश्लेषकहरूले बताएका छन्।

आधिकारिक कोरियन सेन्ट्रल न्युज एजेन्सी (केसएनए)का अनुसार प्योङयाङको नयाँ रक्षा उद्योग एकाइमा बनाइएका ‘मल्टिपल रकेट लन्चरको २४० एमएम सेल’को ‘उडान सुविधाहरू र हिट तथा एकाग्रता सूचकहरू’ परीक्षणका क्रममा ‘अत्यन्त सन्तोषजक ढंगले मूल्यांकन’ गरिएको थियो।

नेता किमले यस वर्षका लागि युद्ध सामग्री उत्पादन योजनालाई निश्चित रूपमा गुणात्मक ढंगले पूरा गर्नुपर्ने आवश्यकतामाथि जोड दिएका केसिएनएले बताएको छ। ‘नयाँ प्रविधिसहितको रकेट लन्चरले उत्तर कोरियाको सेनाको आर्टरी बललाई बलियो बनाउन रणनीतिक परिवर्तन ल्याउनेछ,’ किमको भनाइ उद्धृत गर्दै केसिएनले भनेको छ।

यसै साताको प्रारम्भमा किमले मुलुकको पहिलो ‘आणविक ट्रिगर’ अभ्यासको निरीक्षण गरेका प्योङयाङले बताएको छ। यसमा ‘दुश्मनहरू’लाई चेतावनीका रूपमा आणविक जवाफी हमलाको अनुकरण सामेल थियो।

सोलमा उत्तर कोरियाली अध्ययन विश्वविद्यालयका अध्यक्ष याङ मु–जिनले शुक्रबारको घोषणाका आधारमा उत्तर कोरियाले दक्षिण कोरियाको राजधानी क्षेत्रलाई लक्षित गरी सटिक आक्रमणका लागि मार्गदर्शन प्रविधिलाई एकीकृत गर्न ‘केही प्रगति’ हासिल गरेजस्तो देखिएको बताए। ‘सम्पूर्ण मुलुक मिसाइल रक्षा उद्योग प्रदर्शनीजस्तो देखिन्छ,’ उनले भने।

गत वर्ष उत्तर कोरियाले सन् २००६ देखि लागू राष्ट्रसंघीय प्रतिबन्धलाई बेवास्ता गर्दै तथा वासिङ्टन र सोलले चेतावनी दिए पनि रेकर्ड संख्यामा मिसाइल परीक्षण गरेको थियो। प्योङयाङले सन् २०२२ मा आफैँलाई ‘अपरिवर्तनीय’ आणविक हतियारसम्पन्न मुलुक घोषणा गरेको छ।

यसै वर्ष प्योङयाङले दक्षिण कोरियालाई आफ्नो ‘प्रमुख शत्रु’ घोषणा गरेको छ। पुनर्मिलन र पहुँचका लागि समर्पित एजेन्सीहरूलाई अलग गरेको छ र ‘०.००१ मिमी’ क्षेत्रीय उल्लंघनमा समेत युद्धको धम्की दिएको छ।