नयाँ सत्तागठबन्धन बनेपछि ‘पर्ख र हेर’को अवस्थामा रहेको एकीकृत समाजवादीका अध्यक्ष माधवकुमार नेपालको निवासमा नेताको लर्को लागेको छ ।
हिजोदेखि सुरु भएको भेटको क्रम आज पनि जारी रहेको छ । सरकारमा सहभागिताका लागि औपचारिक प्रस्ताव लिएर पुगेका प्रधानमन्त्री पुष्पकमल दाहाल प्रचण्ड र एमाले अध्यक्ष केपी ओली बाहिरिएलगत्तै नेपालनिवासमा राप्रपा अध्यक्ष राजेन्द्र लिङ्देनको प्रवेश भएको छ ।
वर्तमान सत्तागठबन्धनमा सहभागी नहुने निर्णयमा पुगेको राप्रपाका अध्यक्षको प्रवेश अर्थपूर्ण मानिएको छ । यसअघि प्रधानमन्त्री प्रचण्ड र ओलीले सरकारमा सहभागिताका लागि नेपाललाई औपचारिक रूपमै प्रस्ताव राखेका थिए । त्यसमा नेपाल सकारात्मक रहेको भेटपछि नेताहरूले बताएका छन् ।
कांग्रेससँगको गठबन्धन तोडेर प्रधानमन्त्री प्रचण्डले हिजो मात्रै एमाले–रास्वपा, जसपा सम्मिलित नयाँ गठबन्धन बनाएका छन् । इतरपक्षहरूले अर्को गठबन्धनको प्रयास सुरु भएको खबर आज दिनभर चलेका थिए ।
तर, राप्रपाका नेताहरूले भने एकीकृत समाजवादीका अध्यक्ष बिरामी भएको थाहा पाएपछि स्वास्थ्यलाभको कामना गर्न आफ्ना अध्यक्ष गएको दाबी गरेका छन् ।