खेलकुद प्रिन्ट संस्करण

रग्बी लिगमा गोर्खाली पहिलोपटक च्याम्पियन 

चारपटकको च्याम्पियन विभागीय टोली त्रिभुवन आर्मी क्लबलाई अन्तिम खेलमा ६६–७ ले हराउँदै गोर्खालीले जित्यो उपाधि

गोर्खाली रग्बी क्लबले पहिलोपटक राष्ट्रिय फिफ्टिन्स रग्बी लिग च्याम्पियनसिपको उपाधि जितेको छ । कीर्तिपुरस्थित दशरथ रंगशालामा चारपटकको च्याम्पियन विभागीय टोली त्रिभुवन आर्मी क्लबलाई ६६–७ को स्कोरमा हराउँदै गोर्खालीले पाँचौँ संस्करणमा आएर पहिलोपटक उपाधि हात पारेको हो । राष्ट्रिय टोलीले भरिएको गोर्खालीले खेलभरि चारपटकको च्याम्पियन आर्मीलाई दबाबमा राखेको थियो । पहिलो हाफमा रातो कार्ड पाउँदा आर्मी १४ खेलाडीमा सीमित बन्यो । त्यसपछि मात्रै आर्मीले सात अंक जोडेको हो । पहिलो हाफमै आर्मी ७–३६ ले पछि परेको थियो । 

गोर्खालीको टोलीमा सबै खेलाडी राष्ट्रिय टोलीका थिए । थप तीन विदेशी खेलाडीको साथ गोर्खालीलाई थियो । आर्मीमा भने दुई मात्रै राष्ट्रिय टोलीका खेलाडी थिए । आर्मीले कबड्डी र खोखोका खेलाडीलाई समावेश गर्दै रग्बी टोली निर्माण गरेको थियो । 

अपराजित रहँदै उपाधि
गोर्खाली रग्बी टोली अपराजित रहँदै च्याम्पियन बनेको हो । गोर्खालीले पहिलो खेलमा पुलिस क्लबलाई ५४–३ को स्कोर हराएको थियो । दोस्रो खेलमा एपिएफलाई ४९–२० ले हराएको हो । टोलीले तीन खेलबाट नौ अंक जोड्दै शीर्ष स्थानमा रहेर च्याम्पियन भएको हो । उपाधिसँगै गोर्खाली रग्बीले एक लाख रुपैयाँ नगद पुरस्कार जितेको छ । प्रतियोगितामा सशस्त्र प्रहरी बलको एपीएफ क्लब दोस्रो बन्यो । 

लिग चरणको आफ्नो अन्तिम खेलमा नेपाल पुलिस क्लबलाई ७७–६ को स्कोरमा हराउँदै एपिएफ उपविजेता बनेको हो । एपिएफले सात अंक जोड्यो । एपिएफले ५० हजार रुपैयाँ नगद प्राप्त गर्‍यो । च्याम्पियनसिपमा तेस्रो भएको आर्मीले पाँच अंक जोड्यो । नेपाल प्रहरी तीन अंकसाथ चार टिम सहभागी लिगमा अन्तिममा रह्यो । प्रतियोगितामा एपिएफका प्रमेश चौधरी उत्कृष्ट खेलाडी घोषित भएका छन् ।