पशुपति विकास कोषका तत्कालीन सदस्यसचिव डा. प्रदीप ढकाललाई विशेष अदालतले धरौटीमा रिहा गरेको छ । पशुपतिमा जलहरी चढाउँदा भ्रष्टाचार भएको भनी दायर मुद्दामा बुधबार विशेषले यस्तो आदेश गरेको हो ।
विशेषका उपरजिस्ट्रार धनबहादुर कार्कीले ढकाललाई तीन लाख रुपैयाँ धरौटीमा छाड्ने आदेश भएको बताए । उनी बुधबार विशेषमा उपस्थित भएका थिए । एक साताअघि यसै मुद्दाका अर्का प्रतिवादी डा. मिलन थापा विशेष अदालतमा उपस्थित भएका थिए । कोषका पूर्वकोषाध्यक्ष थापालाई पनि तीन लाख धरौटीमा रिहा गरिएको थियो ।
ढकालसमेतले सुनको जलहरी चढाउने क्रममा सुनको परिमाण तथा गुणस्तरमा अनियमितता गरेको भन्दै दायर मुद्दा विशेषमा विचाराधीन छ । ढकालका साथै पूर्वकोषाध्यक्ष थापा र स्टोरकिपर अरुणकुमार श्रेष्ठलाई यस मुद्दामा प्रतिवादी बनाइएको छ ।
अख्तियार दुरुपयोग अनुसन्धान आयोगले गत १४ असोजमा पशुपतिको जलहरी निर्माण र प्रतिस्थापनमा अनियमितता भएको भन्दै विशेषमा मुद्दा दायर गरेको थियो । एक हजार चार सय ९१ ग्राम ७१८ मिलिग्राम सुन भ्रष्टाचार भएको दाबी अख्तियारले गरेको छ ।