उच्च अदालत पटनको आदेशसँगै टुकुचा खोलाआसपासमा रहेका जग्गाको लगत कट्टा गर्न काठमाडौं महानगरले भूमि, सहकारी तथा गरिबी निवारण मन्त्रालयलाई पत्र पठाएको छ । टुकुचा क्षेत्रमा रहेका व्यक्तिका जग्गाको लगत कट्टा गरेपछि मात्रै खुला गर्न सकिने भन्दै महानगरले सोमबार मन्त्रालयलाई पत्र पठाएको हो । 

महानगरका अनुसार जग्गाको लगत कट्टा गरिदिने कार्य मन्त्रालयको हो । त्यसपछि खोला क्षेत्रमा बनेका संरचना हटाउने र खोला खुला महानगरले गर्नेछ । हात्तीसार क्षेत्रमा टुकुचा खोला र खोलाको बहाब क्षेत्रभित्रको जग्गा त्रुटिवश व्यक्तिविशेषको नाममा दर्ता रहन गएको देखिएको हुँदा यथाशीघ्र व्यक्तिविशेषको नाममा दर्ता रहेको उक्त लगत कट्टा गर्नुपर्ने महानगरको पत्रमा उल्लेख छ । ‘सार्वजनिक प्रयोजनमा रहने गरी प्रबन्ध गर्ने सम्बन्धमा आवश्यक कारबाहीका लागि मालपोत ऐन, ०३४ को दफा २४ को प्रयोजनार्थ अनुरोध गरिन्छ,’ महानगरले भनेको छ, ‘मालपोत ऐन, ०३४ को दफा २ ले नदी, खोलानाला तथा सोको क्षेत्राधिकारको जग्गालाई सरकारी र सार्वजनिक जग्गा मानेको छ ।’ 

सोही ऐनको दफा २४ (२) ले सरकारी सार्वजनिक जग्गा व्यक्तिविशेषका नाममा दर्ता हुन गएमा त्यस्तो दर्ता स्वतः बदर हुने र  सम्बन्धित मालपोत कार्यालय वा नेपाल सरकारले तोकेको अधिकारीले सोको लगत कट्टा गर्नुपर्ने व्यवस्था छ । सो कानुनी व्यवस्थाको प्रतिकूल हुने गरी काठमाडौं महानगरपालिका वडा नम्बर १ हात्तीसार क्षेत्रमा टुकुचा खोलाको जग्गा व्यक्तिविशेषका नाममा दर्ता कायम रहन गएको अवस्था पत्रमार्फत जानकारी गराएको हो । मन्त्रिपरिषद्को १ मंसिर ०६५ को निर्णयले कुनै पनि खोला, खोल्सी र राजकुलो छोप्न बन्देज लगाएको छ ।