बागमती प्रदेशका मुख्यमन्त्री शालिकराम जम्कट्टेलले पहिलोपटक विश्वासको मत लिएको ६७ दिनमा दोस्रोपटक पुनः विश्वासको मत पाएका छन् । प्रदेश सभाको शुक्रबार बसेको बैठकमा प्रस्तुत भएको मुख्यमन्त्री जम्कट्टेलको विश्वासको मतसम्बन्धी प्रस्तावको पक्षमा ६७ सांसदले मतदान गरेका हुन् ।

प्रदेश सभाका सभामुख भुवनकुमार पाठकले निर्णयार्थ प्रस्तुत गरेको विश्वासको मतसम्बन्धी प्रस्तावको पक्षमा शुक्रबारको बैठकमा उपस्थित ९१ सांसदमध्ये ६७ जनाले मतदान गरे । यसैगरी प्रस्तावको विपक्षमा १७ जनाले मतदान गरे भने सात सांसद तटस्थ बसेका थिए ।

मुख्यमन्त्री जम्कट्टेललाई प्रदेश सभामा प्रतिनिधित्व गर्ने सात दलमध्ये चार दलका सांसदले विश्वासको मत दिएका छन् । उनलाई विश्वासको मत दिनेमा कांग्रेस, माओवादी केन्द्र, एकीकृत समाजवादी र हाम्रो नेपाली दलका सांसद रहेका छन् ।

यसअघि सरकारमा रहेको एमाले, राप्रपा र प्रतिपक्षमा रहेको नेमकिपाले भने मुख्यमन्त्री जम्कट्टेललाई विश्वासको मत दिएनन् । यसअघि माघ ३ गते पहिलोपटक प्रदेश सभाबाट विश्वासको मत लिएका मुख्यमन्त्री जम्कट्टेललाई ६ दलका एक सय पाँच सांसदले विश्वासको मत दिएका थिए ।

एक सय १० सांसद रहेको प्रदेश सभामा कांग्रेसका ३७, एमालेका २७, माओवादी केन्द्रका २१, राप्रपाका १३, एकीकृत समाजवादीका सात, नेमकिपाका तीन र हाम्रो नेपाली पार्टीका दुई सांसद छन् । विश्वासको मत पाएसँगै मुख्यमन्त्री जम्कट्टेल नेतृत्वको सरकारले निरन्तरता पाएको छ । प्रदेश सभाको बैठक अर्को सूचना नभएसम्मका लागि स्थगित भएको छ ।