तत्कालीन पाँचदलीय गठबन्धनमा निर्वाचनअघि भएको सहमतिविपरीत शक्ति बाँडफाँटमा ‘आत्मघाती’ अडान राख्दा संघदेखि प्रदेशसम्मका राजकीय सत्ताबाट वञ्चित भएको कांग्रेसले राष्ट्रपतिमा बाजी मारेको छ । एमाले–माओवादीसहितको सातदलीय सत्तागठबन्धन दुई महिनामै भत्काएर कांग्रेसले शक्तिमा पुनरागमनको संकेत गरेको छ ।

पुरानो पाँचदलीय गठबन्धनमा थप तीन दल मिसिएर शुक्रबार बनेको आठदलीय गठबन्धनले राष्ट्रपतिमा कांग्रेसका उम्मेदवारलाई अघि सार्ने निर्णय गरेको छ । प्रधानमन्त्रीनिवास बालुवाटारमा साँझ भएको आठ दलको बैठकमा कांग्रेस उम्मेदवारलाई राष्ट्रपतिमा समर्थन गर्ने सहमति बनेको हो । नयाँ गठबन्धनमा कांग्रेस, माओवादी, एकीकृत समाजवादी, जसपा, जनमत पार्टी, नागरिक उन्मुक्ति पार्टी, लोसपा र जनमोर्चा छन् । 

पौडेल राष्ट्रपतिमा लगभग पक्का, आठदलीय नयाँ गठबन्धनसँग ६१% मतभार
आठदलीय गठबन्धनका तर्फबाट कांग्रेस वरिष्ठ नेता रामचन्द्र पौडेल राष्ट्रपतिको उम्मेदवार बन्ने लगभग पक्का भएको छ । स्रोतका अनुसार कांग्रेस सभापति शेरबहादुर देउवाले माओवादी अध्यक्षसमेत रहेका प्रधानमन्त्री प्रचण्ड र एकीकृत समाजवादीका अध्यक्ष माधव नेपाललाई पनि पौडेललाई अघि सार्ने जानकारी दिइसकेका छन् ।

आठ दलको बैठक चलिरहेका वेला तीन नेताबीच करिब डेढ घन्टा छुट्टै छलफल भएको थियो । सोही क्रममा पौडेललाई राष्ट्रपति बनाउने सहमति भएको हो । कांग्रेसमा कृष्णप्रसाद सिटौला पनि राष्ट्रपतिको दाबेदार छन् । तर, देउवाले शनिबार बस्ने कार्यसम्पादन समितिको बैठकबाट पौडेललाई अघि सार्ने बताएका छन् । 

तीन नेता पालैपालो प्रधानमन्त्री बन्ने 
नयाँ गठबन्धनमा भएको सहमतिअनुसार माओवादी अध्यक्ष प्रचण्ड, कांग्रेस सभापति शेरबहादुर देउवा र एकीकृत समाजवादीका अध्यक्ष माधव नेपाल आगामी पाँच वर्षमा पालैपालो प्रधानमन्त्री बन्नेछन् । सुरुको अढाई वर्ष प्रचण्डले देश हाँक्नेछन् । त्यस्तै, देउवा डेढ वर्ष र नेपाल एक वर्ष प्रधानमन्त्री बन्नेछन् । देउवा र नेपालमध्ये को अगाडि प्रधानमन्त्री बन्ने भन्ने नेताहरूले खुलाएका छैनन् ।

चुनावअघि तत्कालीन पाँचदलीय गठबन्धनमा सुरुको दुई वर्ष प्रचण्ड, त्यसपछिको दुई वर्ष देउवा र अन्तिम एक वर्ष नेपाल प्रधानमन्त्री बन्ने सहमति भएको थियो । तर, कांग्रेसले राष्ट्रपतिसँगै पहिलो कार्यकालको प्रधानमन्त्रीमा अडान लिएपछि गठबन्धन नै भत्किएको थियो ।

 डेढ घन्टा शीर्ष तीन नेताको छलफल र सहमतिपछि टुंगोमा 
आठ दलको बैठक चलिरहेकै बीचमा प्रधानमन्त्री प्रचण्ड, कांग्रेस सभापति शेरबहादुर देउवा र एकीकृत समाजवादीका अध्यक्ष नेपालबीच छुट्टै डेढ घन्टा छलफल भएको थियो । स्रोतका अनुसार तीन नेताबीच राष्ट्रपतिमा रामचन्द्र पौडेललाई अघि सार्ने र एकीकृत समाजवादीलाई पनि पावर सेयरिङ (प्रधानमन्त्री)मा सहभागी गराउने सहमति बनेको थियो । त्यस्तै, उपराष्ट्रपतिमा जसपाबाट साझा उम्मेदवारका रूपमा अघि सार्ने सहमति भएको छ ।

डेढ घन्टा लामो छलफलपछि शीर्ष नेताहरू ‘हामी सहमतिमा पुग्यौँ’ भन्दै आठ दलको बैठकमा सहभागी भएका थिए । जहाँ प्रधानमन्त्री प्रचण्डले राष्ट्रपतिमा कांग्रेस उम्मेदवारलाई सघाउने प्रस्ताव राखेका थिए । शीर्ष नेताहरूको सहमतिलाई आठ दलले सर्वसम्मतिले पारित गरेका थिए । ‘शीर्ष तीन नेतामा माधव नेपाललाई प्रधानमन्त्रीमा एडजस्ट गर्ने गरी सहमति जुटेको हो । सहमतिअनुसार कांग्रेसको राष्ट्रपति, जसपालाई उपराष्ट्रपति दिने सहमति भएको छ,’ स्रोतले नयाँ पत्रिकासँग भन्यो । स्रोतका अनुसार पहिलो अढाई वर्ष प्रचण्डले सरकारको नेतृत्व गर्नेछन् । त्यस्तै, देउवाले डेढ वर्ष र नेपाल एक वर्ष प्रधानमन्त्री बन्ने सहमति छ । 

राष्ट्रपतिको उम्मेदवारी आज
२५ फागुनमा हुने राष्ट्रपति निर्वाचनका लागि शनिबार उम्मेदवारी दर्ता हुँदै छ । नयाँ बानेश्वरस्थित अन्तर्राष्ट्रिय सम्मेलन केन्द्रको लोत्से हलमा बिहान १० देखि दिउँसो ३ बजेसम्म मनोनयनपत्र दर्ताको समय तोकिएको हो ।