- वि.सं २o८१ बैशाख २४ सोमबार
नेपाल टी–२० लिग क्रिकेट प्रतियोगिताको बुधबार नवौँ खेलमा फार वेस्ट युनाइटेड र लुम्बिनी अल स्टार्सले प्रतिस्पर्धा गरेका थिए । यो खेलको नतिजा २० ओभरमा निस्किएन । लिगमै पहिलोपटक टाई भएपछि खेलको छिनोफानो सुपर ओभरबाट भयो । सुपर ओभरमा लुम्बिनीले बाजी मार्यो । फार वेस्ट युनाइटेड नौ रनले पराजित भयो । पहिलो ब्याटिङ गरेको फार वेस्टले २० ओभरमा ६ विकेटको क्षतिमा एक सय ३७ रन बनाएको थियो । लुम्बिनीले पनि २० ओभरमै नौ विकेट गुमाएर एक सय ३७ रन जोड्दा खेल टाई भयो ।
सुपर ओभरमा २० रनको लक्ष्य
लुम्बिनीले सुपर ओभरमा पहिलो ब्याटिङ गरी एक विकेट गुमाएर १९ रन बनायो । केवल एक ओभरको खेलमा लुम्बिनीका ब्याट्सम्यानले दुई छक्का प्रहार गरे । सुपर ओभरमा फार वेस्टका करण केसीले बलिङ गरेका थिए । श्रीलंकाली ब्याट्सम्यान लहिरूले करणले फ्याँकेको तेस्रो र चौथो बललाई छक्का प्रहार गरे ।
उनले पाँचौँ बलमा तीन रन लिए । सुपर ओभरमा २० रनको लक्ष्य पछ्याएको फार वेस्टविरुद्ध किशोर महतोले बलिङ गरे । कप्तान दीपेन्द्रसिंह ऐरीले जोखिम उठाउँदै किशोरलाई बल दिए । महतोको पहिलो बलमै हसमतुल्लाहले छक्का प्रहार गरे । त्यसपछि सम्हालिएका महतोले कसिलो बलिङ गरेका थिए । महतोले दोस्रो बल डट फ्याँके । तेस्रोदेखि छैटौँ बलमा फार वेस्टले चार रन मात्र जोड्यो ।
लहिरू म्यान अफ दी म्याच
एक सय ३८ रनको लक्ष्य पछ्याएको लुम्बिनीको ब्याटिङ सहज भएन । इनिङ्सको ९.४ ओभरमा लुम्बिनीले ६ विकेट गुमाएर ५६ रन जोडेको थियो । धर्मराएको इनिङ्सको सातौँ क्रमका विपुल शर्मा र नवौँ क्रमका गुलसन झाले उत्कृष्ट प्रदर्शन गरे । विपुलले २७ बलमा एक चौका र दुई छक्का प्रहार गरी ३१ रन बनाए । गुलसनले २४ बलमा तीन चौका र एक छक्का प्रहार गरी ३६ रनको योगदान दिए ।
लुम्बिनीका लागि ओपनर श्रीलंकाली ब्याट्सम्यान लहिरू मिलान्थले २० बलमा दुई चौका र चार छक्का प्रहार गरी ३४ रनको योगदान दिए । सुपर ओभरमा उत्कृष्ट ब्याटिङ गरी लुम्बिनीलाई लगातार चार खेलमा जित दिलाउन महŒवपूर्ण योगदान गरेका लहिरू नै खेलका म्यान अफ दी म्याच भए । लुम्बिनीका आठ ब्याट्सम्यानले दोहोरो रन बनाएनन् । बलिङका क्रममा करण केसीले २० रन खर्चेर दुई विकेट लिए । शेर मल्लले २७ रनमा दुई विकेट नै हात पारे ।
अर्धशतक बनाउन चुके देव
पहिलो ब्याटिङ गरेको फार वेस्टका ओपनर देव खनाल अर्धशतक बनाउन केवल दुई रनले चुकेका छन् । उनी ४८ रनमा आउट भए । इनिङ्सको १४.२ ओभरमा विकेट गुमाउनुअघि देवले ४२ बलमा पाँच चौका प्रहार गरेका थिए । फार वेस्टको ब्याटिङमा कप्तान हसमतुल्लाह साहिदीले २९ बलमा तीन चौका प्रहार गरी ३२ रनको योगदान दिए । यसैगरी, भीम सार्कीले १५ रन, विनोद भण्डारीले ११ रन तथा करणले १२ रन बनाए । बलिङमा स्याड्ली भानले ३९ रन दिएर दुई विकेट हात पारे । रोमाञ्चक जितसँगै लुम्बिनीले चार खेलबाट सर्वाधिक आठ रन जोडेको छ । फार वेस्ट दुई अंकका साथ पाँचौँ स्थानमा छ ।
विराटनगर ६ विकेटले विजयी
अघिल्लो खेल सुपर ओभरमा गएपछि लिगको १०औँ खेलमा एक ओभर घटाइएको थियो । बुधबारको दोस्रो खेलमा पोखरा एभेन्जर्स र विराटनगर सुपर किंग्सबीच खेल भएको थियो । पहिलो ब्याटिङ गरेको पोखराले १९ ओभरमा सात विकेट गुमाएर एक सय ३९ रन जोडेको थियो । प्रत्युत्तरमा विराटनगरले १७.४ ओभरमा चार विकेटको क्षतिमा एक सय ४० रन बनायो । जितसँगै विराटनगर लिगको चौथो स्थानमा उक्लेको छ । विराटनगरले तीन खेलबाट दुई अंक जोडेको छ । पोखराले चार खेलमा अंक जोड्न सकेको छैन ।
हुसेनको अर्धशतकीय इनिङ्स
लक्ष्य पछ्याउँदा विराटनगरका लागि हुसेन टलाटले अर्धशतकीय योगदान दिएका थिए । उनले ३० बलमा चार चौका र एक छक्का प्रहार गरी ५० रन बनाए । खेलको अन्तिमसम्म उनी आउट भएनन् । विराटनगरका लागि एन्ड्रे म्याककार्थी र अर्जुन साउदले पहिलो विकेटका लागि ४७ रनको साझेदारी गरे । एन्ड्रेले ३३ बलमा २१ रन तथा अर्जुनले २२ बलमा २५ रनको योगदान दिए । अर्जुनले आफ्नो इनिङ्समा दुई छक्का र एक चौका प्रहार गरेका थिए । पृथु बास्कोटाले आठ बलमा १५ रन तथा विवेक यादवले आठ बलमा १४ रनको योगदान दिए ।
यसअघि ब्याटिङ गरेको पोखराका लागि कुशल मल्लले सर्वाधिक ३७ रनको योगदान दिए । उनले १८ बलमा समान तीन चौका र छक्का प्रहार गरी टोलीको रनरेट उकास्ने काम गरे । पुछारका ब्याट्सम्यान सस्तै रनमा आउट हुँदा पोखरा स्कोर बोर्डमा चुनौतीपूर्ण योगफल बनाउन चुक्यो । पोखराका लागि श्रीलंकाली खेलाडी उपल थरंगाले १९ रन तथा सिद्धान्त लोहनीले १९ बलमा तीन छक्काको सहयोगमा ३७ रन जोडे ।
