उद्योग वाणिज्य तथा आपूर्तिमन्त्री दिलेन्द्रप्रसाद बडूले वीरगन्ज भन्सारको राजस्व लक्ष्य पूरा गर्नको लागि चोभार सुख्खा बन्दरगाह आउने कन्टेनरहरू वीरगन्जमा रोक्न नमिल्ने बताएका छन् । बिहीबार मन्त्रालयमा चोभार सुख्खा बन्दरगाह पूर्ण क्षमतामा सञ्चालनमा ल्याउने सम्बन्धमा सरोकारवाला निकायहरूसँगको छलफलमा बोल्दै मन्त्री बडूले यस्तो बताएका हुन् ।
मन्त्री बडूले राजस्व संकलनको लक्ष्य पूरा गर्नको लागि वीरगन्जमा सामान ‘ब्लक’ गर्दा पनि नाकाको लोड नहट्ने हो भने ब्लक गर्नुको कुनै अर्थ नहुने भन्दै त्यस्तो गर्न नहुने बताए । वीरगन्ज नाकाबाट काठमाडौं उपत्यकामा आउने सामान धेरै भएकाले उपत्यकामा आउने लोड मात्रै घटाउन सके पनि छिटो छरितो हुने उनको भनाइ थियो ।
‘वीरगन्जलाई छुटै राजस्व बढाउने टार्गेट थियो। राजस्व बढाउन त्यहाँ रोक्नुको कुनै अर्थ छैन । त्यसकारणले यसलाई अर्थ मन्त्रालय,राष्ट्र बैंकले पनि हेर्नुपर्छ । टार्गेट दिएको छ भनेर वीरगन्जमा ब्लक गर्ने भयो भने ब्लकको ब्लक रहने लोड नहट्ने हो भने अर्थ केही हुँदैन,’ मन्त्री बडूले भने ।
मन्त्री बडूले चोभार सुख्खा बन्दरगाहमा राज्यको ठूलो लगानी रहेकाले तत्काल पूर्ण रूपमा सञ्चालनमा ल्याउनुपर्ने बताए । बन्दरगाह सञ्चालनमा ल्याउनको लागि प्रचारप्रसार गर्न निर्देशनसमेत दिए । बन्दरगाह सञ्चालनमा नीतिगत समस्या भए त्यसलाई परिवर्तन गर्न सरकार तयार रहेको उनको भनाइ थियो ।
