गणतान्त्रिक व्यवस्थालाई जीवन्त राख्न राजनीतिक दलहरूमा इमानदारिताको खाँचो छ : देवकोटा

राष्ट्रिय सभा सदस्यका लागि नेकपा (माओवादी केन्द्र)लगायतका पार्टीहरूको साझा उम्मेदवारका रूपमा रहेका डा. खिमलाल देवकोटाले जनताको बृहत् सहभागिताबाट ल्याइएको गणतान्त्रिक व्यवस्थालाई जीवन्त राख्न राजनीतिक दलहरूमा इमानदारिताको खाँचो रहेको बताएका छन् ।

उम्मेदवारी दर्तापछि संक्षिप्त प्रतिक्रिया दिँदै देवकोटाले देशको संविधानको मूल प्रवाहलाई ट्र्याकमा ल्याउने प्रयासका लागि आफूले उम्मेदवारी दर्ता गराएको बताए । उनले प्रदेशको भूमिकालाई अझै जनमुखी, पारदर्शी र जिम्मेवार बनाउनुपर्नेमा जोड दिए । 

यस्तै, अर्का उम्मेदवार नेपाल मजदुर किसान पार्टीका नेता कृष्णबहादुर तामाङले पनि आफूलाई पार्टीले दिएको निर्देशनबमोजिम उम्मेदवारी दर्ता गरेको बताए ।  देशको संविधान, ऐन तथा कानुनलाई आत्मसात् गर्दै नेपाली जनताको हितमा सधैँ स्वार्थरहित भएर अगाडि बढ्ने उनले  दृढता व्यक्त गरे ।