जनकपुरधामकी पत्रकार उमा सिंहको १२औँ स्मृति दिवसको अवसरमा जनकपुरधाम उपमहानगरपालिकाले पाँच लाखको अक्षय कोष स्थापना गरेको छ ।
आज सोमबार बिहान उपमहानगरपालिकामा पत्रकार उमा सिंहको स्मृति दिवससमेत मनाइएको छ । पत्रकार सिंहप्रति श्रद्धासुमन अर्पण गर्दै जनकपुरधाम उपमहानगरपालिकाका मेयर लालकिशोर साहले जनकपुरधामले एक निडर पत्रकार गुमाएकोप्रति दुःख व्यक्त गरेका थिए ।
उनले पत्रकार सिंहको बीभत्स हत्या हुनु जनकपुरधामका लागि दुर्भाग्यपूर्ण रहेको बताएका थिए । उनले भने, ‘बोल्नमा निडर, भयरहित पत्रकारको रूपमा चिनिएकी पत्रकार सिंहको बीभत्स हत्या दुर्भाग्यपूर्ण हो । समाजले धेरै ठूलो नोक्सानी व्यहोर्नुपरेको छ ।’
उनले पत्रकारहरूका लागि गत वर्ष घोषणा गरिएको पाँच लाखको अक्षय कोष यस वर्षदेखि विधिवत रूपमा सञ्चालनमा आएको बताए । जसबाट पत्रकारिता क्षेत्रमा उत्कृष्ट योगदान दिने पत्रकारहरूलाई पुरस्कृत हुनेछन् ।
