राष्ट्रिय स्वतन्त्र पार्टीका सभापति रवि लामिछाने पाँचदिने औपचारिक भारत भ्रमण सम्पन्न गरी स्वदेश फर्किने दिन शुक्रबार परराष्ट्रमन्त्री शिशिर खनाल तीनदिने औपचारिक भारत भ्रमणमा प्रस्थान गर्ने भएका छन् । परराष्ट्र मन्त्रालयले बिहीबार मन्त्री खनालको भ्रमणतालिका सार्वजनिक गरेको छ ।
परराष्ट्रमन्त्री खनालको यो पहिलो द्विपक्षीय औपचारिक विदेश भ्रमण हुनेछ । भ्रमणका क्रममा शनिबार नयाँदिल्लीस्थित हैदराबाद हाउसमा उनका भारतीय समकक्षीसँग औपचारिक द्विपक्षीय वार्ता हुने कार्यक्रम तय गरिएको छ ।
त्यसै दिन मन्त्री खनालले भारत सरकारका केही केन्द्रीय मन्त्रीहरूसँग भेटवार्ता गर्नेछन् । भारतीय प्रधानमन्त्री नरेन्द्र मोदीसँग पनि उनको शिष्टाचार भेटवार्ता हुने सम्भावना छ । ‘प्रधानमन्त्री मोदीसँग परराष्ट्रमन्त्रीज्यूले शिष्टाचार भेट गर्नुहुने विश्वासका साथ तयारी गरिरहेका छौँ,’ परराष्ट्रका एक उच्च अधिकारीले नयाँ पत्रिकासँग भने ।
‘परराष्ट्रमन्त्री खनाल औपचारिक भ्रमणका क्रममा शुक्रबार अपराह्न भारत जानुहुने कार्यक्रम छ र उहाँ आइतबार साँझ स्वदेश फर्किनुहुनेछ,’ परराष्ट्र मन्त्रालयका प्रवक्ता लोकबहादुर पौडेल क्षेत्रीले नयाँ पत्रिकासँग भने ।
भारतीय समकक्षी डा. एस जयशंकरको निमन्त्रणामा उनी जान लागेका हुन् । भ्रमण दलमा परराष्ट्रको दक्षिण एसिया महाशाखा प्रमुख गेहेन्द्र राजभण्डारी, कार्यवाहक नेपाली राजदूत डा. सुरेन्द्र थापासहित नेपाली अधिकारीहरू रहनेछन् ।
परराष्ट्रमन्त्री खनाल र समकक्षी जयशंकरबिच २७ चैतमा हिन्द महासागरीय सम्मेलनमा सहभागी हुने क्रममा मौरिससमा भेटवार्ता भएको थियो । उनीसँग दोस्रोपटक परराष्ट्रमन्त्री खनालको भेट हुन लागेको हो । ‘दुवै पक्षले व्यापार, लगानी, कनेक्टिभिटी, ऊर्जा तथा जनस्तरको सम्बन्धलगायत क्षेत्रहरूमा सहकार्य बढाउने उद्देश्यसहित पारस्परिक हितका विषयहरूमा छलफल गर्नेछन्,’ परराष्ट्रको विज्ञप्तिमा छ ।
दिल्लीमा सभापति लामिछानेले भने– समृद्धिको ढोका खुल्यो
रास्वपा सभापति रवि लामिछानेले नेपालमा समृद्धिको नयाँ ढोका खुल्ने बताएका छन् । नयाँदिल्लीस्थित आइटिओको पेरेलाल भवनमा बिहीबार आयोजित नेफाली समुदायसँगको अन्तरक्रिया कार्यक्रममा सम्बोधन गर्दै उनले आफू समृद्धिको ढोका खोल्ने उद्देश्यसहित भारत आएको बताए । साथै, उनले भ्रमणका क्रममा भएका उच्चस्तरीय भेटवार्ताप्रति सन्तुष्टि र उत्साह व्यक्त गरे ।
रास्वपा प्रतिनिधिमण्डलको नेतृत्व गर्दै पाँचदिने औपचारिक भ्रमणका क्रममा सोमबार दिल्ली पुगेका सभापति लामिछानेले मंगलबार भारतीय प्रधानमन्त्री नरेन्द्र मोदीसँग तथा सोमबार गृहमन्त्री अमित साह, विदेशमन्त्री डा. एस जयशंकर र भाजपा अध्यक्ष नितिन नवीनसँग बेग्लाबेग्लै भेटवार्ता गरेका थिए ।
‘यसबिचमा ध्यानपूर्वक नेपालका कुराहरू सुनिए, मैले विभिन्न बैठकमा नेपालसँग सँगसँगै अगाडि बढ्ने प्रतिबद्धता प्राप्त गरेँ,’ लामिछानेले समर्थकहरूको समूहलाई गरेको सम्बोधनमा भने, ‘म प्रसन्न भएर आशा बोकेर फर्किँदै छु । आशावादी भएर अगाडि बढ्दै छु । नेपाल समृद्धिको यात्रामा भारतसँगै अघि बढ्नेछ । अब समृद्धिको ढोका खुल्यो ।’
पार्टी सभापतिका रूपमा दिल्ली भ्रमणका क्रममा प्राप्त गरेको सम्मान र सद्भावलाई नेपाली जनताको सम्मान भन्दै लामिछानेले भने, ‘हामीले पाएको सम्मान तपाईंहरूमाथि भारत सरकारले गरेको हो । यो सम्मानका लागि भारत सरकार र भाजपालाई धेरैधेरै धन्यवाद दिन चाहन्छु । अब हामी सम्मानित मात्रै भएर हुँदैन, समृद्ध पनि हुनुपर्छ ।’
सभापति लामिछानेले विगतमा राजनीतिको ढोका खोल्न नेपालबाट भ्रमणहरू भएको दाबी गर्दै आफू समृद्धिको ढोका खोल्न आएको बताए । ‘नयाँदिल्लीमा राजनीतिका ढोका खोल्नका लागि धेरै मानिसहरू आए । म यसपटक समृद्धिको ढोका खोल्न आएको हुँ,’ लामिछानेले भने, ‘समृद्ध नेपालको एउटा सपना हामीले सिंगो युगदेखि देखिरहेका थियौँ, त्यसमा सहकार्य गर्ने एजेन्डा बोकेर आएको हुँ ।’
