मन्थली नगर अस्पतालमा भएको एकदिने निःशुल्क विशेषज्ञ स्वास्थ्य शिविरमा एक हजार ५५ जना नागरिकले स्वास्थ्य सेवा लिएका छन् । सोमबार मन्थली अस्पतालको आयोजना तथा काठमाडाैं मेडिकल कलेजको समन्वयमा उक्त शिविर सञ्चालन भएको हो । गाउँमै विशेषज्ञ सहितको शिविर भएपछि आर्थिक अभावमा वर्षौँदेखि रोग पालेर बसेका बिरामीहरू उपचार लिन अस्पताल आएका थिए । शिविरमा बिहानैदेखि बिरामीहरूको भिड लागेको थियो ।
एकदिने सो शिविरमा जनरल स्वास्थ्य, स्त्री रोग, हाडजोर्नी, शल्यक्रिया, दाँत, आँखा, नाक, कान, घाँटी, बालरोग र नसासम्बन्धी रोगको परीक्षण तथा उपचारसमेत गरिएको थियो । शिविरमा उपचारका लागि आएका बिरामीहरूमध्ये २५० भन्दा बढी बिरामीले विभिन्न रोगको एकैपटक उपचार गराएको मन्थली नगर अस्पतालका मेडिकल सुपरिटेन्डेन्ट डा. केशवसिं धामीले जानकारी दिए ।
उनका अनुसार उपचार लिन आएका केही बिरामको जिल्लामा उपचार सम्भव नभएपछि थप उपचारका लागि काठमाडाैंस्थित मेडिकल कलेजमा रेफर गरिएको छ । विपन्न र आर्थिक अवस्था कमजोर भएका केही बिरामीको निःशुल्क उपचारको व्यवस्थासमेत मिलाइएको छ । रामेछापमा उपचार सम्भव नभएपछि रेफर भएर काठमाडाैं मेडिकल कलेज सिनामंगलमा जाने बिरामीलाई सो अस्पतालले उपचार गर्दा लाग्ने शुल्कमा केही सहुलियत दिँदै आएको थियो ।
