- सिन्धुलीका सिडिओ र एसपीलाई निलम्बनको माग, बलात्कारको जाहेरी दिनेमाथि जातीय हिंसामा कारबाही हुनुपर्ने अडान
सुनकोशी गाउँपालिका– ३, जुम्लीडाँडाका २३ वर्षीय श्रीकृष्ण विकको प्रहरी हिरासतमा रहेका वेला गत ७ वैशाखमा मृत्यु भएको घटनामा संसदीय छानबिनको माग गर्दै रास्वपा सांसद खगेन्द्र सुनारसहितले बिहीबारबाट सिन्धुली प्रशासनमा धर्ना थालेका छन् । १६ वर्षीया किशोरीसँग प्रेमविवाह गरेपछि श्रीकृष्णलाई बलात्कार मुद्दा लगाएर फसाइएको र प्रहरी हिरासतभित्र भएको घटना आत्महत्या मान्न नसकिने भन्दै पीडित परिवार र अधिकारकर्मी आन्दोलनमा छन् ।
यहीबीच सांसदहरू खगेन्द्र सुनार, रिमा विश्वकर्मा, सुस्मा स्वर्णकार, गणेश विक, खिमा विश्वकर्मा र आशिष गजुरेललेले सिन्धुली प्रशासनको गेटमा धर्ना सुरु गरेका हुन् । सिन्धुलीका प्रमुख जिल्ला अधिकारी, प्रहरी उपरीक्षक, इलाका प्रहरी कार्यालय खुर्कोटका प्रहरी निरीक्षक र ड्युटीमा खटिएका कमाण्डरलाई निलम्बन गर्नुपर्ने माग रहेको सुनारले बताए । उनका अनुसार प्रहरीको आन्तरिक उच्चस्तरीय, विज्ञ छानबिन, संसदीय छानबिन हुनुपर्ने माग छ भने बलात्कार मुद्दा भनेर जोहरी दिनेलाई जातीय हिंसामा कारबाही माग गरिएको छ ।
प्रहरीले ‘आत्महत्या’ दाबी गरे पनि पीडित परिवारले घटनालाई ‘रहस्यमयी’ भन्दै निष्पक्ष छानबिनको माग गर्दै आएका छन् । यद्यपि, सहायक प्रमुख जिल्ला अधिकारी दीपेन्द्र पौडेलको संयोजकत्वमा सात सदस्यीय छानबिन समिति गठन गरेर बिहीबारबाट छानबिन थालिसकिएको छ । घटनाको सत्यतथ्य बुझ्न राष्ट्रिय दलित आयोगको केन्द्रीय टोली काठमाडौंबाट सिन्धुलीतर्फ प्रस्थान गरेको छ । टोलीले सरोकारवालासँग छलफल गरी दोषीमाथि कारबाहीका लागि सिफारिस गर्ने दलित अधिकारकर्मी निर्मल रम्तेलले बताए ।
विवाह छुटाउन बलात्कार मुद्दा लगाइएको परिवारको आरोप
१६ वर्षीया किशोरीसँग प्रेमविवाह गरेपछि श्रीकृष्णलाई बलात्कार मुद्दा लगाएर फसाइएको परिवारको आरोप छ । सो विवाह सम्बन्ध छुटाउन बालिका पक्षले ललितपुरको सातदोबाटो प्रहरीमा बलात्कारको उजुरी दिएपछि विकलाई ३ वैशाखमा पक्राउ गरिएको थियो । ललितपुरबाट पक्राउ गरी खुर्कोट ल्याइएका विकलाई प्रहरीले ‘आरोप स्वीकार गर्न दबाब दिँदै आएको’ परिवारको भनाइ छ ।
इलाका प्रहरी कार्यालय खुर्कोटको हिरासतमा रहेका विकले सोमबार दिउँसो शौचालयको झ्यालमा आफ्नै सर्टको पासो लगाएर आत्महत्या गरेको जिल्ला प्रहरी कार्यालय सिन्धुलीका एसपी लालध्वज सुवेदीले बताए । तर, परिवारले भने प्रहरीको दाबीमाथि प्रश्न उठाइरहेका छन् । ‘गल्तीको सजाय भोग्छु भनेर छोरा आफैँ आएर बसेको थियो, ड्युटीमा रहेका प्रहरीले के हेरेर बसे ? ज्यान सुरक्षित हुन्छ भनेर प्रहरीको जिम्मा लगाएको छोराको लास पाउँदा कसरी विश्वास गर्ने ?’ मृतककी आमा विन्दा विकले प्रश्न गरिन् । घटनास्थलको फोटो वा भिडियो नदेखाउनु र अस्पताल पुर्याएर मृत्यु भइसकेपछि मात्र परिवारलाई खबर गर्नुले घटना थप शंकास्पद बनेको आफन्तहरूको तर्क छ । प्रहरीले मंगलबार राति नै पोस्टमार्टम गर्ने तयारी गरे पनि परिवारले सहमति दिएका छैनन् । दलित अधिकारकर्मीले सिन्धुलीमा प्रदर्शन गर्दै न्यायको माग गरिरहेका छन् ।
