नेपाली चलचित्र शिक्षाको स्तर उकास्ने दीर्घकालीन दृष्टिसहित चलचित्र विकास बोर्डले ०८२ सालका लागि विभिन्न तहमा अध्ययनरत विद्यार्थीलाई छात्रवृत्ति वितरण गरेको छ। फिल्मसम्बन्धी विषयमा अध्ययन, अनुसन्धान तथा एकेडेमिक प्रगतिका लागि नियमित रूपमा सञ्चालन गर्दै आएको यो कार्यक्रम बोर्डको शैक्षिक क्षेत्रप्रतिको प्रतिबद्धताको महत्त्वपूर्ण उदाहरणका रूपमा लिइएको छ।
यस वर्ष माध्यमिक तह (२) मा चलचित्र विषय लिएका विद्यार्थीलाई वार्षिक रु. १५ हजारका दरले छात्रवृत्ति प्रदान गरिएको छ। विद्यालय तहमै फिल्मसम्बन्धी अध्ययनलाई प्रोत्साहित गर्न बोर्डले विगत केही वर्षदेखि निरन्तर सहयोग गर्दै आएको छ, जसले युवाहरूलाई प्रारम्भिक उमेरमै चलचित्र शिक्षाप्रति आकर्षित गर्न मद्दत गरेको छ।
यस्तै, स्नातक तहमा चलचित्रसम्बन्धी विषय लिएर अध्ययनरत विद्यार्थीलाई वार्षिक रु. ५० हजारको छात्रवृत्ति प्रदान गरिएको छ। खुला, महिला र समावेशी (मधेशी, दलित, आदिवासी, जनजाति) समूह समेटिने गरी वितरण गरिएको यो सहयोगले फिल्म शिक्षामा पहुँच विस्तार र विविध समुदायका प्रतिभालाई अघि बढाउने लक्ष्यलाई सुदृढ गरेको बोर्डले जनाएको छ। उच्च शिक्षामा आर्थिक कारणले पछि पर्न सक्ने विद्यार्थीका लागि यो कार्यक्रम ठुलो प्रोत्साहन बनेको छ।
त्यसैगरी, स्नातकोत्तर तहमा चलचित्रसम्बन्धी अनुसन्धान गरिरहेका विद्यार्थीलाई रु. २५ हजारका दरले शोध अनुदान प्रदान गरिएको छ। चलचित्रका सामाजिक, सांस्कृतिक, सौन्दर्यशास्त्रीय तथा नीतिगत पक्षमा आधारित अनुसन्धानलाई प्रोत्साहन दिन यसले महत्त्वपूर्ण उत्प्रेरणा दिएको छ। अनुसन्धानमै आधारित नीतिगत सुधारका लागि आवश्यक सामग्री उत्पादनमा पनि बोर्डका यी कार्यक्रम प्रभावकारी मानिएका छन्।
स्नातकोत्तर तहमै चलचित्र ऐननियम, नीतिगत अध्ययन तथा शोधपत्र लेखन गर्दै आएका विद्यार्थीलाई समेत रु. २५ हजारको छात्रवृत्ति दिइएको छ। चलचित्र नीति तथा संरचनागत सुधारका लागि तयार हुने पेसेवर संसाधन निर्माणमा बोर्डको यो सहयोग भविष्यका फिल्म योजनाकार, विश्लेषक तथा नीति निर्माताका लागि आधार निर्माण गर्ने किसिमले उपयोगी हुने अपेक्षा गरिएको छ।
चलचित्र विकास बोर्डका अनुसार फिल्म उद्योगको दिगो विकास शिक्षा, अनुसन्धान र समावेशी प्रतिभा विकासमार्फतै सम्भव हुने भएकोले बोर्डले यसलाई दीर्घकालीन कार्यक्रमका रूपमा अघि बढाइरहेको छ। छात्रवृत्ति कार्यक्रमले नेपाली चलचित्र क्षेत्रका भावी पेसेवरलाई प्रेरित गर्ने, प्रतिभा भित्र्याउने र क्षेत्रलाई व्यवस्थित बनाउँदै लैजान सहयोग गर्ने बोर्डको विश्वास छ।
