आवेश खानले अन्तिम ओभरमा मात्र सात रन खर्चिएपछि लखनउ सुपर जायन्ट्सले इन्डियन प्रिमियर लिग (आइपिएलम)मा दोस्रो जित निकालेको छ । शुक्रबार घरेलु मैदानमा लखनउले मुम्बई इन्डियन्सलाई १२ रनले हरायो । पहिलो ब्याटिङ गरेको लखनउले आठ विकेट गुमाउँदै दुई सय एक रनको लक्ष्य प्रस्तुत गरेको थियो । प्रत्युत्तरमा मुम्बईले पाँच विकेट गुमाउँदा मात्र एक सय ९१ रन बनाएको हो ।
अन्तिम ओभरमा मुम्बईलाई खेल जित्न २२ रन चाहिएको थियो । तर, क्रिजमा रहेका कप्तान हार्दिक पाण्ड्या र मिचल माट्नरले टिमलाई जिताउन सकेनन् । यसअघि तिलक बर्माले २३ बलमा २५ रन मात्रै बनाएपछि क्रिज छाडेका थिए ।
जितपछि लखनउ चार खेलबाट चार अंकसहित छैटौँ स्थानमा छ । मुम्बई चार खेलमा मात्र एक जितसहित सातौँ स्थानमा रह्यो । दुई खेलबाट चार अंकसहित पन्जाब किंग्स शीर्ष स्थानमा छ । यस्तै, दिल्ली, आरसिबी, गुजरात, कोलकाताको समान चार अंक रहेको छ ।
लखनउ पहिलो खेलमा दिल्ली क्यापिटल्ससँग एक विकेटले पराजित हुँदा दोस्रो खेलमा सनराइजर्स हैदराबादविरुद्ध पाँच विकेटले विजयी भयो । तेस्रो खेलमा भने लखनउ पन्जाब किंग्ससँग आठ विकेटले पराजित भएको हो । पहिलो खेलमा चेन्नई सुपर किंग्ससँग चार विकेट र दोस्रो खेलमा गुजरात टाइटन्ससँग ३६ रनले पराजित मुम्बईले तेस्रो खेलमा कोलकाता नाइट राइडर्सलाई आठ विकेटले पराजित गरेको थियो ।
लक्ष्य पछ्याएको मुम्बईका लागि दुवै ओपनरले खराब प्रदर्शन गरे । मध्यक्रममा भने मुम्बईले सानदार प्रदर्शन गर्यो । सूर्यकुमार यादवले ६७ रन बनाएपछि मुम्बई जिततर्फ लम्किएको थियो । सूर्र्यकुमारले ४३ बलमा नौ चौका र एक छक्का हिर्काएका थिए । नमन धिरले २४ बलमा चार चौका र तीन छक्कासहित ४६ रन बनाएका हुन् । यसअघि ओपनर विल ज्याक्सले पाँच र रायन रिकल्टनले जम्मा १० रन बनाएका थिए । तर, टोली अन्तिम ओभरमा भने चुक्यो । पाड्याले १६ बलमा २८ तथा साटनरले दुई बलमा दुई रन बनाए । लखनउका लागि शार्दूल ठाकुर, आकाश दीप, आभेष र दिगवेश राथीले समान एक विकेट हात पारे ।
यसअघि आइपिएलको १६औँ खेलमा टस हारेर ब्याटिङ गरेको लखनउका लागि ओपनरद्वय मिचल मार्स र ऐडन मारक्रमले अर्धशतक बनाएका थिए । मार्सले ३१ बलमा नौ चौका र दुई छक्कासहित आक्रामक ६० रन बनाए । मारक्रमले पनि ३८ बलमा दुई चौका र चार छक्कासहित ५३ रनको योगदान गरेका हुन् । दुई खेलाडीबिच पहिलो विकेटका लागि ४२ बलमा ७६ रनको साझेदारी भएको थियो ।
चौथो विकेटका लागि मारक्रम र आयुष बदोनीले ५१ रनको साझेदारी गरेका थिए । आयुष ३० रन बनाएर आउट भए । डेभिड मिलरले २७ रन जोडे । मुम्बईका लागि कप्तान हार्दिक पाण्ड्याले सर्वाधिक पाँच विकेट लिए । उनले चार ओभरमा ३५ रन खर्चिएका थिए । ट्रेन्ट बोल्ट, अश्वनी कुमार र भिगनेस पाथुरले समान एक विकेट हात पारेका हुन् । शनिबारको खेलमा चेन्नई र दिल्ली तथा पन्जाब र राजस्थान रोयल्सबिच प्रतिस्पर्धा हुनेछ ।
