कञ्चनपुरका बाढी प्रभावितलाई महाकाली प्रादेशिक अस्पतालले निःशुल्क उपचार गर्ने भएको छ। बाढीमा परेर घाइते र प्रभावित क्षेत्रका बिरामी हुने नागरिकको अस्पतालले निःशुल्क उपचार गर्ने अस्पताल व्यवस्थापन समितिका अध्यक्ष कृष्णानन्द भट्टले जानकारी दिए।
स्वास्थ्य समस्या देखिए तत्काल अस्पतालमा ल्याई उपचारमा सहयोग गरिदिनसमेत उनले आग्रह गरे। ‘बाढीमा परेर चोटपटक वा बिरामी भएमा निःशुल्क उपचार गर्ने व्यवस्था मिलाइएको छ, हालसम्म पाँचजनाको उपचार गरिसकेका छौँ, बिरामी आउनेक्रम जारी छ,’ अध्यक्ष भट्टले भने।
बाढी र डुबानका कारण कञ्चनपुरमा एक हजार एक सय १२ परिवारका चार हजार तीन सय ६५ जना प्रभावित बनेका जिल्ला प्रशासन कार्यालयले जनाएको छ। मौसममा केही सुधार आएपछि बाढी प्रभावित घर फर्किन थालेका छन्।
दोधारा–चाँदनी नगरपालिकाका प्रमुख किशोर लिम्बूले विद्यालयमा आश्रय लिएर बसेका बाढी प्रभावित घर फर्किन थालेका बताए। ‘बस्तीमा पानी घट्न थालेपछि बाढी प्रभावित घर फर्किन थालेका छन्,’ उनले भने, ‘प्रभावितका लागि खान बस्नको व्यवस्था नगरपालिकाले गरिरहेको छ।’
बाढी प्रभावित क्षेत्रमा हाल संक्रामक रोगको जोखिम बढेको छ। चिकित्सकहरूले यस्ता क्षेत्रमा शुद्ध पानी, खाना र सुरक्षित आवासको अभावमा विभिन्न रोगको प्रकोप देखिन सक्ने भन्दै सचेत रहन आग्रह गरेका छन्।
