उच्च राजनीतिक नेतृत्वसँग भेट गर्ने
चिनियाँ जनकंग्रेसको स्थायी समितिका अध्यक्ष ली झाङ्सु तीनदिने नेपाल भ्रमणका लागि सोमबार अपराह्न काठमाडौं आउँदै छन् । सभामुख अग्निप्रसाद सापकोटाको निमन्त्रणामा अध्यक्ष लीसहित उच्च चिनियाँ अधिकारी आउन लागेका हुन् । नेपालमा संसदीय र प्रादेशिक निर्वाचन घोषणापछि भ्रमण गर्ने उनी पहिलो चिनियाँ उच्च अधिकारी हुन् ।
एक साताअघि उनको भ्रमण सार्वजनिक भएको थियो । परराष्ट्र मन्त्रालयका अनुसार सोमबारै सभामुख सापकोटासँग अध्यक्ष लीले प्रतिनिधिमण्डलस्तरीय द्विपक्षीय वार्ता गर्ने कार्यक्रमा छ । अध्यक्ष ली र प्रतिनिधिमण्डलको सम्मानमा सभामुख सापकोटाले सोमबार रात्रिभोज आयोजना गरेका छन् । सापकोटासँगको भेटमा दुवै देशको संसद्बीच अनुभव आदान–प्रदानलगायत विषयमा छलफल हुने भएको छ ।
संसद् सचिवालयका अनुसार भ्रमणमा संसदीय अनुभव साटासाट र प्राविधिक सहयोगसम्बन्धी पत्रमा हस्ताक्षर हुनेछ । संसद्को प्रभावकारिता र रचनात्मक विकासका लागि पनि थप चिनियाँ सहयोगको घोषणा हुने कार्यक्रम छ ।
अध्यक्ष लीले २८ भदौमा प्रधानमन्त्री शेरबहादुर देउवासहित प्रमुख दलका शीर्ष नेतासँग भेटवार्ता गर्ने भएका छन् । प्रधानमन्त्री शेरबहादुर देउवा, एमाले अध्यक्ष केपी ओली र माओवादी अध्यक्ष पुष्पकमल दाहाल प्रचण्डसँग लीको सोही दिन बेग्लाबेग्लै भेटवार्ता हुने कार्यक्रम रहेको परराष्ट्रले जनाएको छ । अध्यक्ष लीले सोही दिन राष्ट्रिय सभाका अध्यक्ष गणेशप्रसाद तिमिल्सिनासँग भेटवार्ता गर्नेछन् । परराष्ट्रमन्त्री डा. नारायण खड्काले २८ भदौमा अध्यक्ष लीसँग शिष्टाचार भेटवार्ता गर्ने कार्यक्रम छ ।
अध्यक्ष लीले भ्रमणको अन्तिम दिन २९ भदौमा राष्ट्रपति विद्यादेवी भण्डारीसँग शिष्टाचार भेट गर्ने कार्यक्रम छ । सोही दिन साँझ ली दक्षिण कोरियाको औपचारिक भ्रमणका लागि प्रस्थान गर्नेछन् ।