माओवादी अध्यक्ष प्रचण्डले भौतिक विकाससँगै सांस्कृतिक, आत्मिक र चेतनाको विकासले मात्र समाज सुमधुर ढंगले अगाडि बढ्न सक्ने बताएका छन् ।
आफ्नो हालैको जापान भ्रमणको अनुभव सुनाउँदै उनले भौतिक विकासमा जापान निकै माथि पुगे पनि आत्महत्याका घटना निकै धेरै हुने गरेको बताए । समाजलाई सुमधुर बनाउन वैचारिक चेतना अनिवार्य हुने उनको भनाइ छ ।
‘जापानको विकास धेरै लोभलाग्दो छ तर मैले त्यहाँका धेरै बुद्धिजीवी तथा स्थानीय नागरिकहरूबाट सुनेँ, आत्महत्या धेरै हुने देशभित्र जापान पनि पर्दोरहेछ । यत्रो विकसित देशमा यति धेरै आत्महत्याका घटना किन हुन्छन् भन्ने जिज्ञासा मैले राखेँ,’ उनले भने, ‘भौतिकसँगसँगै आत्मिक चेतना भएन भने समाजमा सामाञ्जस्यता कायम हुन नसक्ने रहेछ । भौतिक विकास मात्रै पर्याप्त हुने रहेनछ ।’
आज रसियन कल्चर सेन्टरमा आयोजित एक सम्मान कार्यक्रममा प्रचण्डले यी दुईबीचको सन्तुलनले मात्र समाज र मानव जीवन पनि सहज ढंगले अगाडि बढ्ने संसार र हाम्रै अनुभवले देखाउने बताए ।