संसदीय विशेष छानबिन समितिको प्रतिवेदन तयार

तत्कालीन अर्थमन्त्री जनार्दन शर्मामाथिको अभियोग छानबिन गरिरहेको संसदीय विशेष समितिले प्रतिवेदन तयार पारेको छ । प्रतिवेदन भोलि सभामुख अग्निप्रसाद सापकोटालाई बुझाउने तयारी छ । 
चालू आर्थिक वर्षको बजेट बनाउने क्रममा करका दर हेरफेर गराउन अनधिकृत व्यक्तिलाई प्रवेश गराएको शर्मामाथि आरोप लागेको थियो । प्रमुख प्रतिपक्षी दल एमालेले संसदीय छानबिन समिति गठनको माग गरेपछि प्रतिनिधिसभाको बैठकले समिति बनाएको हो । 
समितिले १७ दिन लगाएर छानबिन गरेपछि बिहीबार अन्तिम बैठक बसी प्रतिवेदन तयार पारेको हो । प्रतिवेदनमा के छ भन्नेबारे समितिका सदस्यहरूले सार्वजनिक रूपमा प्रतिक्रिया दिएका छैनन् । उनीहरूले शुक्रबार सभामुख अग्निप्रसाद सापकोटालाई प्रतिवेदन बुझाउने जानकारी मात्र दिएका छन् । 
गत २२ असारमा गठन भएको ११ सदस्यीय समितिले सुरुमा १० दिनको कार्यावधि पाएको थियो । तर, छानबिन नसकिएपछि प्रतिनिधिसभाले सात दिन म्याद थपेको थियो । विशेष छानबिन समिति बनाउनुअघि शर्माले २२ असारमा पदबाट राजीनामा दिएका थिए ।