फ्रन्ट पेज प्रिन्ट संस्करण

तुइन चुँडिएर फेरि अर्का युवक महाकालीमा बेपत्ता

भारतीय बजारमा नुनतेल किनेर सँगै फर्किएका वडाध्यक्ष धीरनसिंह बुढाथोकीले भने– तुइन बाँधेको रूख नै भाँचिएर सचिन महाकालीमा खसे

भारतीय सीमा सुरक्षा बल (एसएसबी)ले तुइन काटिदिँदा दार्चुलाको ब्याँस गाउँपालिका– २ का जयसिंह धामी महाकालीमा बेपत्ता भएको एक वर्ष बित्न नपाउँदै सोही वडाका अर्का युवक पनि तुइन चुँडिएर बेपत्ता भएका छन् । बुधबार ब्याँस– २ दुम्लिङका १८ वर्षीय सचिन बुढाथोकी बल्लुजुडीस्थित तुइन बाँधेको रूख नै भाचिँदा महाकालीमा खसेर हराएका हुन् ।

बुढाथोकी भारतीय बजारबाट नुनतेललगायत दैनिक उपभोग्य खाद्यान्न लिएर फर्किँदै थिए । उनीसँगै वडाध्यक्ष धीरनसिंह बुढाथोकी पनि किनमेल गरेर फर्किएका थिए । वडाध्यक्ष बुढाथोकीले घटनाबारे भने, ‘सचिन पहिले खाद्यान्न लिएर तुइन तर्दैै थिए, म भारतपट्टि नै थिएँ । महाकालीको मध्यभागतिर पुगेपछि भारततर्फ तुइन बाँधेको रूख भाँचियो । सुकेको रूखमा दुई पालाको तुइनको तार बाँधिएको थियो । दिनहुँ स्थानीयहरू यहीँबाट आवतजावत र खाद्यान्न ओसारपसार गर्थे । तर, आज एक्कासि रूख नै भाँचियो ।’ 

स्थानीयहरू दैनिक उपभोग्य सामानका लागि भारतीय बजार पुग्नुपर्ने बाध्यता छ । गत १५ साउनमा एसएसबीले मालघाटस्थित तुइन काटिदिँदा जयसिंह धामी महाकालीमा खसेर बेपत्ता भएपछि उनको गाउँ राप्लामा खाद्यान्न डिपो राखिदिएको त छ, तर दुम्लिङबाट उक्त डिपो पुग्नै दुई घन्टा लाग्छ । १० मिनेटमै पुगिने भारतीय बजारको भन्दा नेपाली डिपोमा खाद्यान्नको मूल्य चर्को रहेको स्थानीय प्रभात बुढाथोकीले बताए । 

विगतमा भारतीय बजार आउजाउ गर्न हाल तुइन रहेकोभन्दा केही माथि काठको अस्थायी पुल थियो । तर, कोरोनाकालमा एसएसबीले उक्त पुल भत्काइदिएपछि स्थानीयले यसैपालि बल्लुजुडीमा तुइन लगाएका थिए । पुल निर्माण गरिदिन माग गर्दै संघीय मन्त्रीदेखि मुख्यमन्त्रीसम्मलाई ज्ञापनपत्र बुझाए पनि सुनुवाइ नभएको दुम्लिङका नागरिकको गुनासो छ । यहाँ एक सय १० परिवार छन् । गत वर्ष जयसिंह धामी बेपत्ता भएको मालघाटमा भने नेपाल–भारत जोड्ने झोलुङे पुल निर्माण अन्तिम चरणमा पुगेको छ । 

जिल्ला प्रहरी कार्यालय दार्चुलाका सूचना अधिकारी इन्स्पेक्टर राजेश शाहीले दुम्लिङ प्रहरी चौकीको टोली स्थानीयसँग मिलेर बेपत्ता युवकको खोजीमा जुटेको बताए । सदरमुकाम खलंगाको महेन्द्र नमुना माविमा पढ्ने सचिन एसइई दिएर गाउँ गएका थिए । 

परिवारको भरोसा नै टुट्यो
वडाध्यक्ष धीरनसिंहका अनुसार सचिनको परिवार विपन्न छ । उनका बुबा करनसिंह र आमा लक्ष्मी अपांगता भएका छन् । उनीहरूका चार सन्तानामा कान्छा थिए सचिन । जेठो छोरा १२ कक्षासम्मको पढाइ सकेर कामको खोजीमा काठमाडौंमा छन् । आर्थिक रूपमा कमजोर परिवारलाई सचिनले पढेर अवस्था सुधार्नेमा ठूलो भरोसा थियो । तर, उही छोरो महाकालीमा खसेको खबर सुनेपछि बुबाआमा होसमा छैनन् । गाउँ नै शोकमा डुबेको छ ।