अर्थमन्त्री जनार्दन शर्माको राजीनामा माग गर्दै युथ कांग्रेस नेपालले सिंहदरबार प्रवेशद्वारमा प्रदर्शन गरेको छ । प्रदर्शन सुरु गर्नेबित्तिकै प्रहरीले झन्डै एक दर्जन प्रदर्शनकारीलाई गिरफ्तार गरेको छ । उनीहरूलाई अहिले महानगरीय प्रहरी कार्यालय सिंहदरबार अनामनगरकाे हिरासतमा राखिएको छ।
प्रदर्शनमा सहभागीले अर्थमन्त्री शर्मालाई तत्काल बर्खास्त गर्नुपर्ने माग राख्दै प्ले कार्ड प्रदर्शन गरेका थिए । उनीहरूले अर्थमन्त्रीले राज्यको ढुकुटीमाथि खेलवाड गरेको र शक्तिको दुरुपयोग गरेको आरोप लगाएका थिए
प्रहरीले युथ कांग्रेसका मनोज पुरी, विनोद देउवा, किरण खनाल, प्रकाश मल्ल, साजन लामा, दिनेश कार्की, रामकृष्ण रिजाल, मणिराज कटुवाल, अनिल पौडेललगायतलाई प्रक्राउ गरेको हो।
अर्थमन्त्रीले सरकारको वार्षिक बजेटलाई अन्तिम रूप दिने वेलामा अनधिकृत व्यक्तिलाई संलग्न गराएको र त्यसको सिसिटिभी फुटेज देखाउन माग गर्दा डिलिट भइसकेको जवाफ दिएपछि उनको विरोध भइरहेको छ।