निर्वाचनमुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियापन्ध्रौं वार्षिकोत्सव विशेषांकखेलकुदविश्वकोरोना अपडेटप्रवासकर्नर किकसम्पादकीय१३औँ वार्षिकोत्सव विशेषांकसाहित्यस्वास्थ्य र जीवनशैलीफिचरलाेकसेवा१४औँ वार्षिकोत्सव विशेषांकप्रेरक प्रसंगटर्निङ प्वाइन्ट्स-२०२२१२औँ वार्षिकोत्सव विशेषांकसप्तरंगटर्निङ प्वाइन्ट्स-२०२०टर्निङ प्वाइन्ट्स-२०१९प्रदेशब्लगEnglish
  • वि.सं २०७९ श्रावण ३० सोमबार
  • Monday, 15 August, 2022
श्रवण थापा सर्लाही
२०७९ असार १८ शनिबार ०६:०६:००
Read Time : > 1 मिनेट
फ्रन्ट पेज प्रिन्ट संस्करण

भारतको चिस्यान केन्द्रमा तीन मजदुर मृत्यु प्रकरण : जाहेरी दर्ताको साढे पाँच महिनापछि ठेकेदार इन्द्रजित पक्राउ

Read Time : > 1 मिनेट
श्रवण थापा, सर्लाही
२०७९ असार १८ शनिबार ०६:०६:००

भारत उत्तर प्रदेशको फरसैया चिस्यान केन्द्रमा पुर्‍याई जोखिमपूर्ण काम लगाउँदा तीन मजदुरको मृत्यु भएको घटनाका मुख्य आरोपी सर्लाहीका ठेकेदार इन्द्रजित राउत पीडितले जाहेरी दिएको साढे पाँच महिनापछि पक्राउ परेका छन् । जिल्ला प्रहरी कार्यालयबाट खटिएको टोलीले बिहीबार राति १० बजेतिर राउतलाई चन्द्रनगर गाउँपालिका– ६ कामतटोलास्थित उनकै घरबाट पक्राउ गरेको हो । 

‘यो घटनाबारे जानकारी पाएपछि फाइल मगाएर हेरेँ,’ दुई महिनाअघि सर्लाही प्रहरी प्रमुख बनेर आएका एसपी प्रवीण पोख्रेलले भने, ‘एक अभियुक्तलाई पक्राउ गरेका छौँ । जिल्ला अदालतबाट पाँच दिनको म्याद थप गरेर अनुसन्धान थालिएको छ । अन्य दुईजना फरार छन् । उनीहरूको पनि खोजी भइरहेको छ ।’ 

प्रवीण पोख्रेल प्रहरी प्रमुख, सर्लाही
यो घटनाबारे जानकारी पाएपछि फाइल मगाएर हेरेँ । एक अभियुक्तलाई पक्राउ गरेका छौँ । जिल्ला अदालतबाट पाँच दिनको म्याद थप गरेर अनुसन्धान थालिएको छ । अन्य दुईजना फरार छन् । उनीहरूको पनि खोजी भइरहेको छ ।

झन्डै ६ महिनाअघि २६ पुसमा मृतकका परिवारले इन्द्रजितसँगै सोही ठाउँका इन्दल राउत र सुनील राउतविरुद्ध पनि जाहेरी दर्ता गराएका थिए । प्रहरीले जाहेरी लिन नमानेपछि घटनाको ७६औँ दिनमा जिल्ला वकिलको कार्यालयमार्फत मुद्दा दर्ता गराएका थिए ।

गत वर्ष ८ र ९ कात्तिकमा चिस्यान केन्द्रमा काम गर्दागर्दै चन्द्रनगर– ६ कामतटोलाका २८ वर्षीय नन्दलाल माझी र ३९ वर्षीय जगदीश माझी तथा ईश्वरपुर नगरपालिका– ३ भक्तिपुरका ३५ वर्षीय सुमन भुजेलको मृत्यु भएको थियो । उनीहरूको शव कानुनी प्रक्रिया र पोस्टमार्टमविना नै ९ र १० कात्तिकमा इन्द्रजितका मान्छेले घरमा ल्याएर छाडिदिएका थिए । त्यतिखेर ३० मजदुरलाई चिस्यान केन्द्रमा बँधुवा मजदुर बनाएका उनले अधिकतम काम लिन खाना–खाजामा थकान नलाग्ने अखाद्य पदार्थ खुवाउने गरेको र त्यसैकारण गम्भीर बिरामी परेका तीनजनाको मृत्यु भएको पीडितको आरोप छ । तीन शवसँगै पाँचजनालाई भने गम्भीर बिरामी अवस्थामा ठेकेदारले घर फर्काएका थिए । 

परिवारको दबाबपछि दुई शवको तत्कालीन जिल्ला अस्पतालमा पोस्टमार्टम गरिएको थियो । उक्त पोस्टमार्टम रिपोर्ट आए पनि अन्तिम निष्कर्ष ल्याबका डाक्टरहरूले पठाउने भएकाले त्यसकै पर्खाइमा रहेको एसपी पोख्रेलले बताए । उनका अनुसार भारतमा घटना भएकाले त्यहाँबाट विवरण र प्रहरी रिपोर्ट ल्याउने काम अहिले पनि चलिरहेको छ । ‘म यहाँ आउनुभन्दा निकै पहिलाको घटना हो । यस विषयमा बुझिरहेको छु । प्रहरी हेडक्वार्टरसँग समन्वय गरेर भारतबाट झिकाउने भनिएको रिपोर्टलगायतको विषयमा फलोअपको काम भइरहेको छ,’ एसपी पोख्रेलले भने, ‘त्यसपछि अभियुक्त र पीडित परिवार तथा घटनास्थलमा रहेका पीडितसँग पनि बयान लिएर अनुसन्धानको निष्कर्षमा पुग्छौँ ।’ 

 

याे पनि पढ्नुहाेस् - ठेकेदारको पासोमा विपन्न : ऋण सकिएन, जीवन सकियो