- वि.सं २o८१ बैशाख १९ बुधबार
पूर्वी पहाडी जिल्ला संखुवासभाको सदरमुकाम खाँदबारीमा रहेको जिल्ला अस्पतालमा अर्थोपेडिक सर्जन डाक्टर गोविन्द केसीले सेवा दिइरहेका छन् । दुर्गम क्षेत्रका नागरिकलाई निःशुल्क स्वास्थ्य सेवा दिन अर्थोपेडिक सर्जन डाक्टर केसी आइतबार संखुवासभा आइपुगेका हुन् । उनले जिल्ला अस्पताल खाँदबारीमा सोमबारदेखि बिहीबारसम्म चार दिन निःशुल्क सेवा रूपमा सेवा दिने जनाइएको छ ।
मेडिकल शिक्षाको विकृति अन्त्यका लागि भन्दै डा. केसी पटक–पटक अनशन बसेका थिए । दुर्गम क्षेत्रका नागरिकलाई निःशुल्क स्वास्थ्य सेवा दिन केसी जिल्ला दौडाहामा छन् । डा. केसी प्रदेश नम्बर १ का खोटाङ, भोजपुरमा सेवा दिँदै संखुवासभा आइपुगेका हुन् । प्रदेश १ का विभिन्न पहाडी जिल्लामा हाडजोर्नीको निःशुल्क उपचार सेवा दिँदै आएको केसीले बताए ।
डाक्टर केसी खाँदबारीमा उपचार गर्न आएको थाहा पाएपछि हाडजोर्नी तथा नसा रोगका बिरामीको भिड लागेको जिल्ला अस्पतालका निमित्त प्रमुख डा. पंकज गुप्ताले बताए । अस्पतालमा उपचारमा खटिएका केसीलाई भेट्न र उपचार गराउन संखुवासभा र भोजपुरका उत्तरी क्षेत्रका बिरामी आएका छन् ।
