पूर्वप्रधानमन्त्री एवं जसपाका संघीय परिषद् अध्यक्ष डा. बाबुराम भट्टराईले वृद्धभत्ता नलिने घोषणा गरेका छन् । संसद् भवनमा पत्रकारहरूसँग कुरा गर्दै भट्टराईले वृद्धभत्ताको उमेर घटाउन जरुरी नभएको पनि बताएका छन् ।

उनले भने, ‘मैले पनि ६८ वर्ष पार गरेकाले मैले पनि वृद्धभत्ता पाउने भएँ । म यो गरिब देशको वृद्धभत्ता ग्रहण गरेर जनतामाथि बोझ थोपर्न चाहन्नँ । त्यो म नलिने घोषणा गर्दछु ।’

एकीकृत सामाजिक सुरक्षा कार्यक्रम ल्याउनुपर्ने उनको भनाइ छ । 

वैज्ञानिक भूमिसुधारको कार्यक्रम आउनुपर्नेमा उनले जोड दिए । व्यापार घाटा घटाउन देशभित्रको पुँजी परिचालन र वैदेशिक लगानी आकर्षित गर्नुपर्ने उनको भनाइ छ ।