भारतीय प्रधानमन्त्री नरेन्द्र मोदीको सुरक्षा व्यवस्थाका लागि भारतीय सुरक्षाकर्मी एसपिजी (स्पेसल प्रोटेक्सन गार्ड) लिएर भारतीय वायुसेनाको विमान गौतम बुद्ध अन्तर्राष्ट्रिय विमानस्थलमा अवतरण गरेको छ ।
बुद्धजयन्तीका दिन भारतीय प्रधानमन्त्री मोदी लुम्बिनी भ्रमणमा आउने कार्यक्रम तय भएसँगै सुरक्षा व्यवस्था मिलाउन भारतीय सुरक्षाकर्मी एसपिजी (स्पेसल प्रोटेक्सन गार्ड) लिएर बुधबार बिहान विमान भैरहवामा अवतरण गरेको हो ।
‘सुरक्षाको हिसाबले व्यवस्थापनका लागि विमान आएको छ,’ जिल्ला प्रहरी कार्यालय रुपन्देहीका प्रहरी प्रमुख एसपी रवीन्द्र रेग्मीले भने । भारतीय वायुसेनाको इलुसियन विमान आइसी– ७६ ले कूटनीतिक उडान गरेको विमानस्थलले जनाएको छ ।
भारतीय प्रधानमन्त्री मोदी जेठ २ गते लुम्बिनी आउने कार्यक्रम छ । उनको भ्रमणपूर्व सुरक्षा व्यवस्था मिलाउन भारतीय सुरक्षाकर्मी लुम्बिनी आइपुगेको एसपी रवीन्द्र रेग्मीले बताए । विमान भने आजै फिर्ता जाने जनाइएको छ ।
