सप्तरंग प्रिन्ट संस्करण

जाहेरी परेको तीन दिन बित्दासमेत पक्राउ परेनन् पल शाह 

जाहेरी दर्ता भएको तीन दिन बितिसक्दा पनि जबर्जस्ती करणीका अभियुक्त पल शाह (पूर्णविक्रम शाह)लाई प्रहरीले पक्राउ गर्न सकेको छैन । उनीविरुद्ध ११ फागुनमा जिल्ला प्रहरी कार्यालय तनहुँमा जबर्जस्ती करणीको जाहेरी परेको थियो । 

पल काठमाडौंभित्रै लुकेर बसेको आशंकापछि जिल्ला प्रहरी कार्यालय तनहुँले जाहेरी दर्ता भएको भोलिपल्टै पक्राउका लागि महानगरीय प्रहरी परिसर काठमाडौंलाई पत्रसहित अनुरोध गरेको थियो । काठमाडौं परिसरले खोजीका लागि मातहतको १४ वटै वृत्तलाई निर्देशन गरेको छ । यस क्रममा प्रहरीले पलनजिकका आफन्त मात्र नभई संगतका साथीसँग समेत सोधपुछ गरेको छ । तर, उनलाई पक्राउ गर्न भने प्रहरीले सकेको छैन । 

काठमाडौं परिसरका प्रवक्ता एसपी दिनेश मैनालीले पलको खोजी भइरहेको जानकारी दिए । उनले भने, ‘पललाई पक्राउ गर्न हामी कहाँपत्र आएको छ । सम्भावित ठाउँमा खोज्ने काम प्रहरीले सुरु गरिसकेको छ । केहीसँग सोधपुछ पनि भएका छन् । तर, फेला पर्न सकेको छैन । खोजी कार्य जारी छ ।’

काठमाडौं परिसरका टोलीले खोजीका क्रममा चलचित्र निर्माता सुर्दशन थापा, अभिनेतृ पूजा शर्मासँग सोधपुछ गरिसकेको छ । टेलिफोन ‘स्विच अफ’ गरेर बसेको हुँदा पलको ‘लोकेसन’ पत्ता लगाउन प्रहरीलाई गाह्रो भइरहेको छ । पलविरुद्ध १७ वर्षीया गायिकालाई पटक–पटक बलात्कार गरेको अभियोग लागेको छ । प्रहरीका अनुसार जिप्रका तनहुँमा पीडितका बुबा उपस्थित भएर पलविरुद्ध जाहेरी दिएका थिए । 

जोहेरीमा उल्लेख भएअनुसार गायिकाविरुद्ध अन्तिमपटक गत १४ वैैशाखामा तनहुँ शुक्लागण्डकी नपा–४ दुलेगौँडास्थित प्रदीप थापाको घरमा बलात्कार गरेका थिए । त्यसअघि उनले १० पुस ०७७ मा पोखरास्थित होटेल प्राइम र ७ चैत ०७७ मा चितवनस्थित गैँडाकोट रिसोर्टमा बलात्कार गरेका थिए ।