प्रतियोगिताको सुरुदेखि नै अग्रता लिएका शुक्रबहादुरले दोस्रो स्थानका रवि राईविरुद्ध एक स्ट्रोक दूरी राख्दै उपाधि हात पारे
पहिलो दिनदेखि अग्रता लिँदै शुक्रबहादुर राईले शुक्रबार सूर्य नेपाल गल्फ टुर २०२१/२२ अन्तर्गत सूर्य नेपाल सेन्ट्रल गल्फ ओपनको उपाधि जितेका छन् । गोकर्ण गल्फ क्लबमा प्रतियोगिताको अन्तिम दिन शुक्रबहादुरले १० अन्डर दुई सय ७८ स्कोर गर्दै उपाधि हात पारेका हुन् । दोस्रो स्थानमा रवि खड्का रहेका छन् । उनले समग्रमा नौ अन्डर दुई सय ७९ स्कोर गरे । शुक्रबहादुरले रविमाथि एक स्ट्रोकको अग्रता लिँदै उपाधिमाथि कब्जा जमाउन सफल भए ।
प्रतियोगितामा भुवन नगरकोटी तेस्रो स्थानमा रहँदा ६ अन्डर दुई सय ८२ कोर गरेका थिए । उनले शुक्रबार इभन पार खेलेका थिए । उपाधिसँगै शुक्रबहादुरले एक लाख ३५ हजार तथा उपविजेता रविले ८८ हजार रुपैयाँ पाएका छन् । तेस्रो स्थानमा रहेका भुवनले ६५ हजार रुपैयाँ पाए । यता एमेच्योतर्फको उपाधि १३औँ दक्षिण एसियाली खेलकुद प्रतियोगिताका दोहोरो स्वर्णपदक विजेता सुवास तामाङले जितेका छन् ।
सुवासले चार अन्डर दुई सय ८४ स्कोर गरी उपाधि हात पारेका हुन् । अन्तिम दिनमा उनले इभन पार खेले । एमेच्योरतर्फ सद्भव आचार्य दोस्रो स्थानमा रहे । उनले समग्रमा तीन ओभर ७५ को स्कोर गरेका थिए । व्यावसायिकतर्फ चौथो स्थानमा रहेका रामे मगरले एक ओभर दुई सय ८९ स्कोर गरेका थिए । उनले ५३ हजार पाँच सय रुपैयाँ पाए । यसैगरी निरज तामाङ पाँचौँ स्थानमा रहँदा चार ओभर दुई सय ९२ स्कोर गरेका थिए । उनले ४५ हजार रुपैयाँ पाए । जयराम श्रेष्ठ व्यावसायिकतर्फ छैटौँ स्थानमा सीमित भएका छन् ।
उनले नौ ओभर दुई सय ९७ स्कोर गरेका थिए । सातौँ स्थानमा बलभद्र राई र सञ्जय लामा रहेका छन् । सूर्यप्रसाद शर्मा नवौँ र धनबहादुर थापा दशौँ स्थानमा रहेका छन् । प्रतियोगिताको अन्तिम दिनमा शुक्रबहादुरले रवि र भुवनविरुद्ध ६ स्ट्रोकको अग्रता लिएका थिए । तेस्रो राउन्डमा भुवनले बल सही स्थानमा नराख्दा एक पेनाल्टीको सामना गरे । रविले पहिलो, तेस्रो, छैटौँ र सातौँ होलमा बर्डिज निकाल्न सफल भए ।
अन्तिमको नवौँ होलमा शुक्रबहादुर र रविबीच केवल तीन स्ट्रोकको अन्तर थियो । प्रतियोगितामा कुल ५८ जना गल्फरले प्रतिस्पर्धा गरेका थिए । जसमा ३९ प्रो तथा १९ एमेच्योर खेलाडी थिए ।
