मुख्य समाचारफ्रन्ट पेजसमाचारदृष्टिकोणअर्थअन्तर्वार्तामल्टिमिडियाखेलकुदविश्वप्रवासकोरोना अपडेटकर्नर किकसम्पादकीयस्वास्थ्य र जीवनशैली१३औँ वार्षिकोत्सव विशेषांकफिचरलाेकसेवा१४औँ वार्षिकोत्सव विशेषांकप्रेरक प्रसंग१२औँ वार्षिकोत्सव विशेषांकसप्तरंगटर्निङ प्वाइन्ट्स-२०१९टर्निङ प्वाइन्ट्स-२०२०प्रदेशब्लगEnglishटर्निङ प्वाइन्ट्स-२०२१
  • वि.सं २०७८ बैशाख २३ बिहीबार
  • Thursday, 06 May, 2021
२०७७ फाल्गुण २७ बिहीबार १०:०५:००
Read Time : > 1 मिनेट
समाचार डिजिटल संस्करण

बाघको आक्रमणबाट फेरि बर्दियामा एक महिलाको मृत्यु

Read Time : > 1 मिनेट
२०७७ फाल्गुण २७ बिहीबार १०:०५:००

बर्दियामा बाघको आक्रमणबाट एक महिलाको मृत्यु भएको छ । मधुवन नगरपालिका– ३ कि अन्दाजी २९ वर्षीया रेनुका सुनारलाई जंगलमा घाँस काट्ने क्रममा बाघले आक्रमण गरेको हो । साथीहरूसँग जंगलमा घाँस काट्न गएकी सुनारलाई आक्रमण गरेको थियो । बाघको आक्रमणको खबर पाउनसाथ उद्धारमा खटिएको प्रहरी टोलीले नेपाल भारतको सीमा क्षेत्रमा उनको शव फेला पारेको थियो ।

सुनारलाई नेपाल–भारत सीमा क्षेत्रको ८४ र ८५ नम्बर पिलरको बीचबाट बाघले आक्रमण गरेको थियो । जिल्ला प्रहरी कार्यालय बर्दियाका प्रहरी नायव उपरीक्षक हेमबहादुर शाहीले महिलाको शव घाँटी र छातीको मासु खाइसकेको अवस्थामा फेला परेको बताए । शवको पोस्टमार्टका लागि जिल्ला अस्पताल बर्दियामा लगिएको प्रहरी नायव उपरीक्षक शाहीले बताए । 

उनीसँगै घाँस काट्न गएका पाँचजना भने भागेर ज्यान जोगाउन सफल भएका छन् । जंगलबाट फर्केपछि उनीहरूले प्रहरीलाई खबर गरेका थिए । 

पछिल्लो समय बर्दियामा पाटेबाघको आक्रमणमा ज्यान गुमाउनेको संख्या बढ्दै गएको छ । बाघले पटक–पटक मानिसलाई आक्रमण गर्न थालेपछि स्थानीयवासी त्रसित भएका छन् । बाघ मानिसमाथि नै आक्रामक बन्दै गएपछि बर्दिया राष्ट्रिय निकुञ्ज र डिभिजन वन कार्यालय बर्दियाले सूचना जारी गरी जंगलमा घाँस–दाउरा काट्न नजान आग्रह गरेको छ । कुनै कारणवश जंगलमा जानै परे पनि समूहमा जानका लागि आग्रह गरिएको छ । 

बर्दिया जिल्लामा यसअघि फागुन १७ गते गेरुवा गाउँपालिकामा भैँसी चराउन गएका ६५ वर्षीय एक पुरुषको पनि  बाघको आक्रमणबाट ज्यान गएको थियो । गत कात्तिक महिनामा मधुवन नगरपालिका– ३ मा नै तीनजनाको बाघको आक्रमणबाट मृत्यु भएको थियो । बर्दिया राष्ट्रिय निकुञ्जका अनुसार यस आर्थिक वर्षमा बाघको आक्रमणबाट मृत्यु हुनेको संख्या आठ पुगेको छ । गत आर्थिक वर्षमा पाँचजनाको बाघको आक्रमणबाट मृत्यु भएको थियो ।